ГАЛТ ТЭРЭГ ЗАМААС ГАРЧ ОЛОН ХҮН ГЭМТЖЭЭ

Италийн Милан хотын ойролцоох хотод зам тээврийн ачаалал хамгийн өндөр байдаг үеэр 300гаруй зорчигч тээвэрлэж явсан галт тэрэг замаасаа гарсан байна. Ослын үеэр багаар бодоход 3эмэгтэй нас барж, зуу орчим иргэн хөнгөн, арав орчим иргэн хүнд шархадсан бол заримынх нь биеийн байдал маш муу байгаа юм. Нас барсан иргэдийн нэг нь осол болсны дараа ээжтэйгээ утсаар ярьж амжсан байна. Милан хотод байдаг Сан Раффаэлэ эмнэлгийн эмч Фанчин Кани "Осол болсны дараа арван өвчтөнийг манай эмнэлэгт шууд авчирсан. Тэдний хоёрын биеийн байдал дээсэн дөрөөн дээр байсан, хоёрынх нь биеийн байдал маш хүнд, 6 хүн нь хүндэвтэр бэртэлтэй" гэж хэлжээ. Осолдсон галт тэрэг Кремонагаас Милан хотыг чиглэн явж байх замдаа Пиолтеллоод замаасаа гарчээ. Ослын шалтгааныг тодруулахаар мөрдөн шалгах ажиллагааг явуулахаар болсон бол нэгэн инженер төмөр замын бүтцийн алдаа гарсан байх гэсэн таамгийг дэвшүүлж байна. Төмөр замын тээврийн газарт ажилладаг нэгэн эрх баригч "Энэ замаар өдөрт 200 галт тэрэг явж өнгөрдөг. энэ замыг байнга 2цагийн турш хааж шалгадаг. Тиймээс одоогийн байдлаар галт тэрэг замаас гарсан шалтгааныг мэдэхгүй байна" гэж мэдэгдлээ. Осол гарсан төмөр зам нь Италийн хамгийн муу төмөр замд тооцогддог бол тус улсын галт тэрэгнүүд ч мөн хуучирч муудсан байх нь элбэг байдаг юм. Хэргийн газар дээр байсан гэрчүүд "Энэнээс ч дор зүйл болж мэдэх байсан" гэж мэдээлж байгаа юм.