ГОО САЙХНЫ ҮЙЛЧИЛГЭЭ ХИЙЛГЭСЭН ТЭМЭЭНҮҮДИЙГ ТЭМЦЭЭНЭЭС ХАССАН БАЙНА

Амьтан тамлах нэгэн шинэ арга амьтдын ертөнцийг цочирдуулаад байна. Саудын Араб улсад болсон тэмээний тэмцээний үеэр "эзэмшигчид нь тэмээнийхээ ам, хамар дээд болон доод уруулууд тэр ч бүү хэл эрүүнд нь ботокс тариулсан байсан" гэж тэмцээнд оролцогч Али Ал Мазрауей "The National" сонинд өгсөн ярилцлагадаа хэлсэн байна. Хүмүүсийн хувьд үрчлээнээс салах зорилгоор хэрэглэдэг ботокс нь тархины хор гэгддэг байна. Түүгээр ч зогсохгүй гоо сайхны тэмцээнд оруулахын тулд тэмээгээ гоо сайхны хагалгаанд оруулсан тохиолдлууд ч илэрчээ. Ихэвчлэн тэмээний чихийг багасгасан байсан юм. Учир нь тэмээний хувьд зөөлөн чих нь гоо сайхны нэгэн шалгуурт тооцогддог байна. Мөн булчинг нь сайжруулахын тулд гормоны бэлдмэл хүртэл өгдөг нь илэрчээ. Тэмцээний дүрэмд "тэмээг уруулдаа тариулсан, үсийг нь засч, хуссан, эсвэл байгалийн төрөлх байдлаас нь ямар нэгэн байдлаар өөрчилсөн бол тэмцээнд оруулахгүй" гэж заасан байдаг ажээ. Энэ жилийн Абдулазиз хааны тэмээний тэмцээнд 30 гаруй мянган тэмээ бүртгүүлснээс ийм зөрчилтэй 12 тэмээг хассан байна. Саудын Араб улсын нийслэл Риад хотоос 120км зайд зохион байгуулагдаж байгаа тэмцээн сар гаруй хугацаанд үргэлжилдэг байна. Тэмцээний үеэр уралдаан, мөн эзнийхээ үгэнд хамгийн сайн ордог тэмээ, зураг дээр хамгийн сайхан гардаг тэмээ зэрэг олон төрлийн тэмцээн болдог байна. "Daily mail"-ийн мэдээлж байгаагаар тэмцээний ялагч нь 57сая долларын шагналтай байдаг байна. Уг тэмцээн нь тэмээг өөрийн улсын билэгдэл хэмээн үздэг Саудын Арабын хаант улсын уламжлалыг хадгалах зорилготой юм.