А.НАВАЛЬНЫЙ ОЛОН УЛСЫН ХҮНИЙ ЭРХИЙН ШҮҮХЭД ГОМДОЛ ГАРГАВ

ОХУ-ын сөрөг хүчний улс төрч Алексей Навальный өөрийг нь баривчилсан тохиолдлууд нь бүгд улс төрийн зорилготой байсан гэсэн гомдлыг гаргасан байна. Штрассбург дахь Европын хүний эрхийн дээд шүүх Оросын засгийн газрын эсрэг гаргасан уг гомдлыг шалгаж байгаа юм. Навальный 2012-2014оны хооронд засгийн газрыг эсэргүүцсэн хөдөлгөөнийг өрнүүлж байх үеэр 7 удаа баривчлагдсан бол үүнтэй холбоотойгоор хүний эрхийн шүүхэд хэд хэдэн удаа гомдол гаргаж хамгийн сүүлд 2017онд анхан шатны шүүхээс түүний гомдлыг хүлээн авсан байна. Шүүгчид тухайн үед Навальныйг баривчилсан явдлыг улс төрийн зорилгогүй гэж үзэж байсан юм. "Намайг эсэргүүцлийн хөдөлгөөн явуулахаа мэдэгдэх бүрт эрх баригчид хууль зөрчин хориглож, эсэргүүцлээ илэрхийлэх, жагсаал цуглаан хийх эрхийг маань хязгаарлах зорилгоор хамтрагчдыг маань баривчилдаг байсан. Энэ бүхнийг улс төрийн баривчилгаа биш гэж хэлэх нь шүүх байрны өмнө үлэг гүрвэлтэй таарна гэж хэлэхтэй ижил юм. Хэрвээ шүүхээс эдгээр баривчилгаануудыг улс төрийн зорилготой гэдгийг баталж өгвөл ОХУ-ын эсрэг том амжилт болох болно" гэж 41 настай улс төрч хэлсэн байна. Хүний эрхийн дээд шүүхийн 17гишүүн шийдвэрээ хэдэн сарын дараа буюу 3-р сарын 18-ны өдөр болох ерөнхийлөгчийн сонгуулиас хойш гаргах юм. Энэ удаагийн сонгуульд Алексей Навальный өрсөлдөхийг хүссэн боловч тэнсэн харгалзах ялаас болоод сонгуулийн хорооноос хориг тавьсан байна. Тиймээс тэрээр 1-р сарын 28-ны өдөр улс орон даяар эсэргүүцлийн хөдөлгөөн явуулахыг уриалаад байна.