НАЙМАН ХУВИЙН ЗЭЭЛИЙН ХҮҮГ БУУРУУЛНА

Засгийн газар ОУВС-гийн "Өргөтгөсөн санхүүжилтийн хөтөлбөр"-т хамрагдсантай холбогдуулан эдийн засгийн гол хөшүүрэг болсон ипотекийн зээлийг хэвээр нь үргэлжлүүлэхийг ОУВС хөтөлбөрт хамрагдах үеэр сануулсан удаатай. Өөрөөр хэлбэл ОУВС-ийн зүгээс "Ипотекийн зээлийг үргэлжлүүлэх нь зөв. Гэхдээ үүнийг хариуцах эзэн нь Монгол банк биш Засгийн газар" гэж үзсэн. Иймээс энэ оноос эхлэн Засгийн газар ипотекийн зээлийг хариуцахаар болж байгаа юм.

Энэ дагуу Засгийн Газар өөрийн эх үүсвэрээр хэрэгжүүлэхээр болж, Монгол Улсын 2017 оны төсвөөс 111 тэрбум төгрөгийг, Монголбанкнаас зээлийн үндсэн төлөлтийг буцаан таталгүйгээр 192 тэрбум төгрөгөөр дахин санхүүжүүлсэн. Энэ оны тухайд Засгийн Газраас 120 тэрбум төгрөг, Монголбанкны зээлийн эргэн төлөлтөөс 180 тэрбум төгрөг санхүүжүүлэхээр төлөвлөж байна.

Улаанбаатар хотод өнөөгийн байдлаар 80 орчим мянган айлын орон сууцны барилга угсралтын ажил үргэлжилж байгаагаас 30 мянган айлын орон сууц ашиглалтад орсон, борлуулалт нь 30 орчим хувьтай байгаа юм. Тэгвэл ипотекийн зээлийг сайжруулах, хүртээмжийг нь нэмэгдүүлэх зорилгоор Сангийн сайдын тушаалаар Ажлын хэсэг байгуулагджээ. Тус ажлын хэсэг " Ипотекийн зээлийн урьдчилгаа 25 хувь, жилийн хүү нь 7.5 хувьтай байх боломжтой" гэсэн судалгааг энэ долоо хоногт багтаан Засгийн газарт танилцуулахаар болсон байна.