ХАРЗНЫ УСАНД УНАСАН ХҮҮГИЙН ЭРЛИЙГ ААВ ЭЭЖИЙНХ НЬ ХҮСЭЛТЭЭР ЗОГСООЛОО

Ховд аймгийн Булган сумын Баянгол багийн "Хагшаал" гэдэг газар, сумын төвөөс хойд зүгт 17 км-т тус сумын харьяат, малчин Б-гийн долоон настай хүү энэ сарын 14-ний өдрийн 13:00 цагт "Булган" голын мөсөн дээр тоглож байгаад харзны усанд унаж осолдсон харамсалтай хэрэг гарсан билээ. Булган гол бол маш том, ширүүн урсгалтай гол бөгөөд Хятадын хил рүү урсдаг байна. Онцгой байдлын аврагчид тус өдрөөс эхлэн эрэн хайх ажиллагааг ''Булган'' гол дагуу зохион байгуулж эхэлсэн бөгөөд хэд хоногийн турш голын мөсөн доогуур аврагчид орж эрлийн ажиллагааг явуулсан ч үр дүнд хүрээгүй байна. Мөн дөрвөн ес эхэлсэн, голын ус руу орж эрж хайхад хүндрэлтэй нөхцөл байдал үүсч эхэлсэн тул хүүгийн ар гэрийнхэн хоорондоо зөвшилцсөний эцэст эрлийн ажиллагааг өнгөрсөн амралтын өдөр зогсоохоор шийджээ. Орон нутгийн эх сурвалжийн мэдээлэхдээ "Хүү тухайн өдрийн 13 цагийн үед Булган голын мөсөн дээр хүүхдүүдтэй тоглож байсан юм байна. Хүү уг нь харзны усны ойролцоо нэг их очоод байдаггүй байсан гэнэ. Гэтэл тэр өдөр юу болсон юм бүү мэд харзны усны ойролцоо очиж тоглож байгаад хальтраад уначихсан юм шиг байна. Тэр өдөр манай суманд бага зэргийн цас ороод голын мөсөн халтиргаатай байсан юм билээ. Хүүг живсэнийг хамт тоглож байсан хүүхдүүд нь харж ар гэрийнхэнд нь мэдэгдсэн байна" хэмээн ярьж байна. Эрлийн ажиллагаан дуудлагаар онцгой байдлын хэлтсийн Гал түймэр унтраах аврах 38 дугаар ангийн салааны захирагч а/д Б.Батсүхээр ахлуулсан алба хаагчид, сумын Засаг даргын тамгын газрын дарга Ш.Ганболдоор ахлуулсан 10 албан хаагч, Цагдаагийн тасгаас дэд түрүүч Г.Сайханбилэгээр ахлуулсан таван албан хаагч, 23 албан хаагч ажилласан. Мөн Баруун бүсийн төв Онцгой байдлын газрын ЭХАА-ийн захирагч С.Даваажаргалаар ахлуулсан зургаан албан хаагч, мөн тус шүүхийн захиргааны ажилтан нар автомашинтайгаар эрлийг зохион байгуулсан. Нийт 128 хүн, 11 техник хэрэгсэлтэйгээр 37 цооног гаргаж усчин аврагчид усанд шумбаж эрж хайсан байна.