АТГ: 6.5 тэрбум төгрөгийн санхүүжилт олгосон гэх хэргийг шүүхэд шилжүүлэх саналтай прокурорт хүргүүлжээ

Авлигатай тэмцэх газрын Мөрдөн шалгах хэлтэс 2026 оны наймдугаар сарын 10-16-ны өдрүүдэд гэмт хэргийн шинжтэй 51 гомдол, мэдээллийг шалгажээ. Үүнээс 13 гомдол, мэдээлэлд хэрэг бүртгэлтийн хэрэг нээх, долоод нь хэрэг бүртгэлтийн хэрэг нээхээс татгалзах саналтайгаар прокурорт шилжүүлсэн бол 31 гомдол, мэдээллийг хянан шалгаж байна.

Мөн эрүүгийн 1053 хэрэгт мөрдөн байцаалтын ажиллагаа явуулснаас 11 хэргийг шүүхэд шилжүүлэх, долоон хэргийг хаах саналтайгаар прокурорт хүргүүлсэн бөгөөд одоогоор 1035 хэрэгт мөрдөн шалгах ажиллагаа үргэлжилж байна.

Энэ хугацаанд хэрэг бүртгэлтийн нэг хэрэгт холбогдуулан хоёр объектод нэгжлэг хийж, гэмт хэрэг гарахад нөлөөлсөн шалтгаан, нөхцөлийг арилгуулахаар мөрдөгчийн мэдэгдэл хүргүүлсэн байна.

Түүнчлэн төрийн болон нийслэлийн өмчит байгууллагын удирдах албан тушаалтнуудтай холбоотой хэд хэдэн хэргийг мөрдөн шалгах ажиллагааг дуусгажээ.

Тухайлбал, төрийн өмчит компанийн удирдах албан тушаалтан Э.Г нь албан тушаалын байдлаа урвуулан ашиглаж, нэр бүхий компанид 6.5 тэрбум төгрөгийн санхүүжилт олгон эдийн засгийн давуу байдал бий болгосон гэх хэргийг шалгаж байна.

Мөн нийслэлийн өмчит компанийн удирдах албан тушаалтан Ж.Э нь албан тушаалын бүрэн эрхээ бусдын нэрийн өмнөөс хэрэгжүүлж томилгоо хийсэн, хууль бус мөнгөн шагнал олгосон, тушаал шийдвэргүйгээр эдийн засгийн давуу байдал бий болгосон гэх хэрэгт холбогджээ. Тэрбээр үнэлгээний хороо байгуулж, сонгон шалгаруулалт явуулалгүйгээр нэр бүхий компанид нийт 222.8 сая төгрөг шилжүүлсэн, өөрийн хамаарал бүхий хуулийн этгээдийн үйл ажиллагааны зардлыг төрийн өмчит аж ахуйн нэгжийн төсвөөс төлүүлж, улсад 42.6 сая төгрөгийн хохирол учруулсан гэх үйлдлүүдэд шалгагдсан байна.

Харин төрийн захиргааны байгууллагын удирдах албан тушаалтан А.Б нь өөрийн удирдлагад ажилладаг албан тушаалтны хамаарал бүхий аж ахуйн нэгжээр ажил гүйцэтгүүлэх хууль бус шаардлага тавьж, үүний хариуд 162.4 сая төгрөгийн хахууль авсан гэх хэргийг мөрдөн шалгах ажиллагааг дуусгаж, шүүхэд шилжүүлэх саналтайгаар прокурорт хүргүүлжээ.