COP17-д оролцохоор Рамсарын конвенцын Ерөнхий нарийн бичгийн дарга ирлээ

COP17-д оролцохоор Рамсарын конвенцын Ерөнхий нарийн бичгийн дарга ирлээ

Рамсарын конвенц буюу Олон улсын ач холбогдол бүхий ус, намгархаг газар, ялангуяа усны шувууд олноор амьдардаг орчны тухай Конвенцын Ерөнхий нарийн бичгийн дарга доктор Мусонда Мумба Цөлжилттэй тэмцэх НҮБ-ын конвенц Талуудын бага хурал (COP17)-д оролцохоор ирлээ.

Түүнийг БОУАӨЯ-ны Төрийн нарийн бичгийн дарга Ш.Батбаяр хүлээн авч уулзав.

Монгол Улс 1998 оны 4 дүгээр сарын 8-нд Намгархаг газрын тухай конвенцын гэрээ байгуулсан. Одоогоор 1,439,530 га талбайг хамарсан Олон улсын ач холбогдолтой Рамсарын намгархаг 11 газартай. Эдгээр газар нь Монголын олон янзын намгархаг газрын экосистемийг төлөөлж, биологийн олон янз байдал, усны нөөц, тэдгээрээс хамааралтай иргэдийн амьжиргааг хамгаалахад хувь нэмэр оруулдгийг БОУАӨЯ мэдээллээ.

Монгол Улс Рамсарын конвенцын хамтын ажиллагаандаа ач холбогдол өгдөг тул ус, намгархаг газрыг хамгаалах, гангийн тэсвэрлэх чадвар, нүүдлийн шувууд, бүс нутгийн хамтын ажиллагааны чиглэлээр түншлэлээ цаашид бэхжүүлэх талаар ярилцах боломж олдож буйд талархалтай байгааг ТНБД Ш.Батбаяр илэрхийллээ. Мөн COP17-гийн үеэр уулзаж байгаа нь цөлжилт, газрын доройтол, ган, усны хомсдол улам бүр харилцан уялдаатай болж байгаа өнөө үед ус, намгархаг газрын асуудлыг дэлхийн хуурай бүс нутгийн тогтвортой хөгжлийн бодлогын салшгүй хэсэг болгон авч үзэхэд ач холбогдолтойг онцлов.

Манай орны газар нутгийн дийлэнх нь хуурай, хагас хуурай экосистемээс бүрддэг учраас нуур, голын татам, булаг шанд, хүлэрт намаг зэрэг ус, намгархаг газрын экосистем онцгой ач холбогдолтой билээ. Монгол Улсад сүүлийн жилүүдэд ган, хуурайшилт, температурын өсөлт, цөлжилт, газрын доройтол нэмэгдэж байгаа нь ус, намгархаг экосистемийн эмзэг байдлыг улам ихэсгэж байна. Тиймээс намгархаг газрын хамгааллыг зөвхөн тусгай хамгаалалттай газар нутгийн бодлогоор хязгаарлах бус, уур амьсгалын өөрчлөлтөд дасан зохицох, газрын доройтлыг багасгах, усны нөөцийг хамгаалах үндэсний бодлоготой нягт уялдуулах шаардлагатай тухай харилцан санал солилцжээ. 

Мусондо Мумба ирснийхээ дараа Цэнгэг усны нөөц, байгаль хамгаалах төвд зочлон, усны салбарын судлаач, төрийн албан хаагч, байгаль орчны хамгааллын чиглэлээр үйл ажиллагаа явуулдаг идэвхтэн иргэд, сурагч, оюутнуудтай уулзсан юм.

Байгаль орчин, экосистемийн хамгаалал, уур амьсгалын өөрчлөлт, тогтвортой хөгжлийн чиглэлээр 25 жил ажилласан олон улсын туршлагатай мэргэжилтэн Мусонда Мумба НҮБ-ын Байгаль орчны хөтөлбөрт 12 жил ажиллаж, Terrestrial Ecosystems Programme-ийг удирдаж байв. Мөн НҮБ-ын Хөгжлийн хөтөлбөрт экосистемийг сэргээх, тогтвортой хөгжлийн ахлах зөвлөх, Rome Centre for Sustainable Development-ийн захирлаар ажиллаж байжээ. Тэрээр 2021 онд Африкийн хамгийн нөлөө бүхий 100 эмэгтэйн нэгээр нэрлэгдсэн, байгаль орчин, тогтвортой хөгжил, ус намгархаг газрын хамгааллын чиглэлээр олон улсын түвшинд идэвхтэй ажиллаж байгаа манлайлагч юм.