БОУАӨ-ийн сайд Ц.Сандаг-Очир Нөмрөгийн дархан цаазат газарт гарсан түймрийн улмаас учирсан хохирлыг тогтоох ажлын хэсэг ирэх арваннэгдүгээр сарын 16-нд дүгнэлтээ гаргана гэж мэдэгдлээ.

Түймэрт өртөөгүй хэсэгт төвлөрсөн ан амьтдыг идэш тэжээлийн хомсдолд орохоос сэргийлэх зорилгоор Засгийн газрын нөөц сангаас 629 сая төгрөг гаргаж долоон цэгт өвс, тэжээл байршуулна.

Мөн түймэртэй холбоотой гарсан бүх зардлыг хохиролд тооцож, буруутай этгээдээр нөхөн төлүүлэхээр төлөвлөж байна. Хохирлын хэмжээг тогтоосны дараа Японы Засгийн газартай хамтран ажиллахаас гадна бусад улс орны байгууллагуудаас нөхөн сэргээлтийн дэмжлэг хүсэх аж.

Цаашид Нөмрөгийн дархан цаазат газарт эрдэм шинжилгээ, судалгааны мониторингийн төв байгуулах саналыг Японы дэмжлэгтэйгээр хэрэгжүүлэх боломжтой гэж сайд Ц.Сандаг-Очир мэдэгдэв.