Guardian: Цар тахлын үеэр Ази гаралтай хүмүүс рүү дайрч давшлах нь эрс нэмэгдсэн

АНУ-д цар тахлын үеэр Ази гаралтай хүмүүс рүү дайрч давшилсан 3800 тохиолдол бүртгэгдээд байгаа тухай “The Guardian” сонин бичсэн байна. Эдгээр 3800 тохиолдол нь зөвхөн албан ёсоор бүртгэгдсэн тохиолдлууд, Ази гаралтай хүмүүсийн нууж өнгөрүүлсэн тохиолдлуудыг оруулбал үүнээс хавьгүй их тоо гарна гэдгийг хүчирхийлэл, гадуурхал, мөрдлөгийн тохиолдлуудын судалдаг “Stop AAPI Hate” төрийн бус байгууллагын шинжээчдийн онцолсон байна.

 Тус ТББ-аас өнгөрсөн долоо хоногт гаргасан илтгэлд дурдсанчлан 2020 оны гуравдугаар сарын 19-өөс  2021 он хоёрдугаар сарын 28-ны хооронд АНУ-ын бүх 50 мужид Ази гаралтай америкчуудыг үг хэлээр дайрч доромжлох, зарим үед биед нь халдсан тохиолдол бүртгэгдсэн байна. Тодруулбал, нийт тохиолдлын 68 хувь нь үг хэлээр дайрч доромжилсон бол 11,1 хувь нь биеийн хүч хэрэглэн дайрсан.

 Түүнчлэн Ази гаралтайн улмаас ажлын байран дээрээ доромжлуулсан, нийтийн тээврийн хэрэгсэл болон олон нийтийн газраар үйлчлүүлэхийг хориглосон, эд зүйлс ба орон байрыг нь эвдэлж сүйтгэсэн тохиолдлууд олон бүртгэгдсэн байна.

 Тухайлбал, Калифорни мужийн Оклендад өмнө нь Ази гаралтай ахимаг насны хүмүүс рүү элдвээр дайрч доромжилсон хэрэгт бүртгэгдэж байсан цагаан арьст хүн дайрсны улмаас 75 настай Хонконг гаралтай эрэгтэй нас барсан. Мөн энэ онд Вича Ратанапакди гэгч 84 настай Тай гаралтай хүн шалтгаангүй дайралтын золиос болж амиа алдсан гэх мэт хэрэг олон гарсан байна.

 Мөн энэхүү илтгэл гарсны дараахан гуравдугаар сарын 17-нд Роберт Аарон Лонг гэгч 21 настай, цагаан арьст залуу Жоржиа мужийн Атланта хотын орчим Ази гаралтай хүмүүсийн ажиллуулдаг массажны салон руу зэвсэглэн халдаж, найман хүнийг буудсан хэрэг гарсан.