Ч.Хүрэлбаатар: Ерөнхийлөгч Х.Баттулга байхгүй мөнгийг тараана гэж юу байдаг юм бэ?

Монгол улсад ковид-19 өвчлөл гарч,  хатуу хөл хорионы уршгаар иргэдийн орлого тасрав. Энэ үед нь Монгол Улсын Ерөнхийлөгч Х.Баттулга өрх бүрт нэг сая төгрөг тараах санал гаргасан ч ЗГ дэмжээгүй. Он солигдох мөчид мөн л сая төгрөгөө өгөхийг шаардана хэмээн мэдэгдэв. Өнгөрсөн долоо хоногт Монгол Улсын Ерөнхийлөгч Х.Баттулга УИХ-ын дарга Г.Занданшатарт оффшор бүсээс оруулж ирэх мөнгөөр өрх бүрт сая төгрөг олгох тогтоолын төслөө өргөн барьсан билээ. Энэ мэдээлэлтэй зэрэгцээд Х.Баттулгын багийнхан оффшороос мөнгө орж ирсэн, түүнийг тараана гэсэн мэдээллийг байршуулж эхэлсэн юм. Өчигдөр Ерөнхийлөгч  Х.Баттулга оффшор бүсээс мөнгө орж ирээгүй болохыг өөрөө баталж хэлсэн. Тэгэхээр магадгүй нэг сая төгрөг гэдэг бол улс төрийн шоу ч байж мэдэхээр харагдаж байна.   

Сангийн сайд Ч.Хүрэлбаатар өөрийн цахим хуудсандаа "Төрийн сан төдийгүй Монголд оффшорын гэгдэх мөнгө огтхон орж ирээгүй гэдгээ Ерөнхийлөгч сая  батлаад хэлчихлээ.  Харин “оффшорын мөнгө” нэрээр Монголбанкаар мөнгө хэвлүүлж тараалгавал төгрөгийн ханш 2012-2016 онд хоёр дахин унасан түүх давтагдана. Цалин, тэтгэврийнх нь худалдан авах чадвар хоёр  дахин унасан гашуун туршлагаа Монголчууд мартаагүй, мартах ч үгүй. Байхгүй мөнгийг тараана гэж юу байдаг юм бэ? гэж бичжээ.