Ковид-19-ийн эсрэг 90%-ийн үр дүнтэй анхны вакцин гарлаа

Эм, биотехнологийн салбарын аваргууд болох Pfizer, BioNTech компаниудын бүтээж буй вакцин Ковид-19 өвчлөлийн эсрэг 90 хувийн хамгаалалттай гэсэн үр дүн үзүүлжээ. Вакцин хөгжүүлэгчид энэ үйл явдлыг  "шинжлэх ухаан болон хүн төрөлхтний хувьд агуу өдөр" гэж зарлалаа. Туршилтад зургаан орны 43500 хүн оролцсон юм. Судалгаанд хамрагдсан хүмүүсийг гурван долоо хоногийн хугацаанд хоёр тунгаар тариад эхний 94 хүнийг эргэн шинжлэхэд дархлаа тогтсон байжээ. Одоо уг вакциныг яаралтай журмаар хэрэглээнд нэвтрүүлж, арваннэгдүгээр сарын эцэс гэхэд нийтэд нийлүүлэхээр ажиллаж байна. 

Туршилтын дараагийн үр дүн сайн гарсан тохиолдолд оны эцсээр 50 сая тунг нийлүүлэх боломжтой аж. Харин 2021 оны эцсээр 1.3 тэрбум тунг үйлдвэрлэх хүчин чадалтай гэнэ. Вакцины ажиллах механизмын тухайд Рибонуклейн хүчлийг (мРНХ) -г агуулсан био бүтээгдэхүүн бөгөөд мРНХ нь биед ормогцоо биеийн эсүүдэд нэвтрэн вирусийн сэртэнгийн уургийг кодлон дархлаа тогтолцоонд таниулдаг зарчимтай юм байна.