Халаасны хулгайн 50 орчим хувь нь автобусанд үйлдэгддэг

Нийтийн тээврийн автобусанд суурилуулсан камерт хийсэн шалгалтын дүнг Сүхбаатар дүүргийн цагдаагийн хэлтсийн байранд өнөөдөр танилцууллаа. Энэ оны эхний есөн сарын байдлаар нийслэлийн хэмжээнд 2300 орчим халаасны хулгайн гэмт хэрэг бүртгэгдсэн байна. Үүний 49.7 хувь нь буюу 1175 нь автобусны буудал, нийтийн тээвэрт үйлдэгджээ. 

Энэ талаар Нийслэлийн цагдаагийн газрын халаасны хулгайн гэмт хэрэгтэй тэмцэх хэлтсийн эрүүгийн мөрдөгч Н.Батцэнгэл "Энэ оны эхний  арван сарын байдлаар халаасны хулгайн гэмт хэрэг, зөрчлийн шинжтэй гомдол 2837 бүртгэгдсэн. Үүнээс 1783 нь гэмт хэргийн шинжтэй, 1054 нь зөрчлийн шинжтэй байна. 300 мянган төгрөгөөс дээш хохиролтой бол эрүүгийн хэрэг үүсгээд хэрэг бүртгэл нээдэг. Харин 300 мянгаас доош хохиролтой бол зөрчлийн хуулийн дагуу арга хэмжээ авдаг. Халаасны хулгайн гэмт хэргээр алдагдаж байгаа эд зүйлийн 98 хувь нь гар утас байна. Үлдсэн хоёр хувь нь бичиг баримт, карт зэрэг юм" гэж ярилаа.

Эх сурвалж:www.polit.mn