Хорих ангид амиа алдсан Л.Бямбаа агсны хэрэгт хариуцлага алдсан гэх ажилтнуудад холбогдох хэргийг хэрэгсэхгүй болголоо

ШШГЕГ-ын харьяа цагдан хорих 461 дүгээр ангид 48 цагийн хугацаатай саатуулагдаж байсан хуульч, шүүгч асан Л.Бямбаа амь насаа алдсан харамсалтай хэрэг гарсан. Энэ хэрэгтэй холбогдуулан таван хүнийг сэжигтэн, яллагдагчаар татаад байгаа юм.

Баянгол дүүргийн Эрүүгийн хэргийн анхан шатны шүүхэд ШШГЕГ-ын харьяа цагдан хорих 461 дүгээр ангийн ажилтнууд болох Г.Сүхболд нарын таван шүүгдэгчид холбогдох хурал хоёр өдөр үргэлжилж, шийдвэрээ гаргажээ.

Анхан шатны шүүхээс “шүүгдэгч нарын үйлдэл, эс үйлдэхүйн улмаас хүний амь нас хохирсон” гэсэн хууль зүйн үндэслэлгүй гэж дүгнэж “гэмт хэргийн шинжгүй“ үндэслэлээр хэрэгсэхгүй болголоо.

Баянгол дүүргийн прокурорын газрын хяналтын прокуророос Г.Сүхболд нарын таван шүүгдэгчид Эрүүгийн хуулийн тусгай ангийн  23.5 дугаар зүйлийн 2 дахь хэсэгт зааснаар /хууль сахиулагч үүргээ биелүүлээгүйн улмаас хүний амь нас хохирсон/ яллах дүгнэлт үйлдэж ирүүлсэн байна.

Хэргийг сануулахад, 2019 оны хоёрдугаар сарын 23-ны өдөр ШШГЕГ-ын Урьдчилан хорих 461-р ангид 48 цагийн хугацаанд саатуулагдахаар ирсэн гавьяат хуульч Л.Бямбаа нь суллагдахаасаа хоёр цагийн өмнө хөхний даруулгаараа амиа егүүтгэсэн талаар эх сурвалжууд мэдээлсэн байдаг.

Баянгол, Хан-Уул, Сонгинохайрхан дүүргийн Эрүүгийн хэргийн анхан шатны шүүхийн Тамгын газар