Улаанбадрах суманд төрсөн гажиг төлийн асуудлыг Тагнуулын байгууллага шалгаж байна

2020 оны тавдугаар сарын 31-нд Дорноговь аймгийн Улаанбадрах сумын нутагт малчин н.Энхжаргалын хотонд гурван чихтэй, дундаа нэг нүдтэй хурга гарсан. 

Гажиг төрсөн хурганы толгойг Улсын мал эмнэлгийн төв лабораторьт шинжлүүлэхээр ирүүлсэн боловч өнөөг хүртэл хариуг нь гараагүй байгаа талаар бид өмнө нь мэдээлж байв. 

Мөн Дорноговь аймгийн Хөвсгөл сумын нутагт 2020 оны хоёрдугаар сард толгойгүй ишиг гарсан. 

2019 оны гуравдугаар сарын 4-нд Дорноговь аймгийн Улаанбадрах сумын нутагт малчин н.Энхбатын хотонд найман хөлтэй ишиг гарсан. Малчин айл нь төлийг гарангуут нь буюу гуравдугаар сарын зургааны өдөр нь Аймгийнхаа мал эмнэлгийн газарт шинжлүүлэхээр өгсөн аж. Гэтэл өнөөг хүртэл юунаас болж гажиг төл гараад байгааг хэн ч тодорхойлж чадаагүй байна. 

2020 оны гуравдугаар сарын 29 нд Дорноговь аймгийн Улаанбадрах сумын нутагт н.Уранбадрахын хотонд дөрвөн чихтэй, найман хөлтэй, нүүргүй ишиг гарчээ. Мөн л аймгийнхаа Мал эмнэлгийн газарт үхсэн ишгийг аваачиж шинжлүүлэхээр өгсөн боловч хариу нь мөн л гараагүй байгаа аж.

Нүд хальтрам төрхтэй гажиг төл мал гарсаар байхад учир шалтгааныг нь өнөөдөр хэн ч тодорхойлж чадахгүй байна. Төл мал яагаад ийм гажиг гараад байгаа талаар Тагнуулын ерөнхий газраас шалгаж байгаа гэх мэдээллийг бидэнд эх сурвалж өгсөн. Учир нь тус газрыг хэн нэгэн зориудаар хордуулсан байх магадлалтай хэмээн үзэж байгаа аж.

 Нутгийн малчдын хувьд Дорноговь аймгийн Улаанбадрах суманд ажилладаг "Бадрах энержи" ХХК-ийн ураны туршилтын олборлолтын үйл ажиллагаатай холбоотой гэж тайлбарлаж байгаа юм. 

Тус аймгаас сонгогдсон УИХ-ын гишүүн Т.Энхтүвшин нь ураны үйл ажиллагаа явуулж буй компанийн тусгай зөвшөөрлийг цуцлах ёстой гэх байр суурийг илэрхийлж байна.  

Сурвалжилсан Н.Өнөрцэцэг, Э.Сугарсүрэн