Наймдугаар сарын 8-ны өдөр Төв аймгийн Баянчандмань суманд болсон овооны наадмын үеэр 10 настай унаач хүү М-ийг уяач М нь ташуурдаж, зодож танхайрсан талаар бид өмнө мэдээлсэн. Манай сайтад мэдээлэл нийтлэгдсэн даруйд Баянчандмань сумын цагдаагийн хэлтсийн хоёр алба хаагч хэргийг шалгаж, уяач М-ийг эрэн хайж эхэлсэн юм. Ингээд 10-ны өдөр өөр наадамд морио уралдуулж явахад нь баривчлан авчирсан. Хэргийг одоо Сонгинохайрхан дүүргийн цагдаагийн нэгдүгээр хэлтэст баримтжуулан шалгаж байна. Бид уяач М-тэй уулзан зарим зүйлийг тодруулсан юм.
Та хэдэн жил морь уяж уралдуулж байна вэ?
Сүүлийн 2-3 жил.
Та хэчнээн адуутай вэ, хурдан адуу нь хэд вэ?
Би 20 гаруй адуутай. Цөөн тооны морь уяж уралдуулдаг.
Та 10 настай унаач хүү М-ийг хэзээнээс таних вэ? Тэр хүү хэзээнээс таны морьдыг унаж уралдаж байгаа вэ?
Өнгөрсөн зургаадугаар сараас М хүүг өөрийнхөө гэрт авчирч, морио унуулсан. Тухайн үед аав ээжтэй нь танилцаад л гэртээ авчирсан.
Хүүгийн аав ээжтэй гэрээ байгуулсан уу? Хүүд төлбөр мөнгө төлж байсан уу?
Гэрээ байгуулж амжаагүй байсан. Мөнгө төгрөг өгөөгүй.
Та хүүг яагаад зодсон юм бэ?
Хэвлэл мэдээллийн хэрэгслээр "морь түрүүлгээгүй шалтгаанаар хүүхэд зодсон" гэсэн мэдээлэл гарсан байна лээ. Энэ бол худлаа. Би тэгж зодоогүй.
Тэгээд?
Хүү хот руу 2-3 хоногоор хэл чимээгүй явчихаад байдаг. Манайд ирснээсээ хойш ч алга болж байсан. Тухай бүрт цагдаагийн байгууллагад мэдэгдэж байсан. 10 настай хүүхэд сураггүй алга болчихоор хэн ч айна шүү дээ. Эцэг эхэд нь юу гэж хэлэх үү гээд л. 8-ны өдрийн овооны наадам болохоос 3 хоногийн өмнө мөн л алга болчихсон. Тэгээд наадам болдог өдөр эргэж ирсэн. 10 настай хүүхэд хэр нь юу ч болоогүй юм шиг шөнө ороод ирдэг. Тэгээд сургах санаатай "хэл сураггүй явж болохгүй" гэдэг талаас нь зааж, сургах санаатай хэд ташуурдсан. Тэгээд л хүү гараад гүйсэн.
Аав нь манай ойролцоо зам ангид ажиллаж байсан. Аавынхаа ажил дээр очсон байна лээ. Тэндээсээ гэр лүүгээ утсаар яриад, ээж нь ирж аваад, харихаар замын машинд дайгдах гээд зогсож байгаад тэр жолоочтой таарсан юм байна лээ. Тэр жолооч нь гэрт нь очиж хувцасыг нь солиод эмнэлэгт хүргэсэн, пост хийсэн үйл явдал болсон байна лээ. Түүнээс биш би "морь түрүүлгэсэнгүй" гэж хүүхэд зодохгүй.
Хүүхдийг зодож сургах эрх ямар хүнд байдаг вэ?
Би сайн мэдэхгүй байна. Харамсаж байна.
Уяач М-ийг "Бага насны хүүхдийг санаатайгаар зодож, хөнгөн гэмтэл учруулсан" зүйлээр шалгаж байна. Энэ зүйлчлэлийн хариуцлага нь 240 цаг нийтэд тустай хөдөлмөр эрхлүүлэх эсвэл 450-2500 нэгжээр торгох заалттай юм.
Харин хүү "Хүүхдийн тусламжийн 108 төв"-ийн Түр хамгаалах байранд байсаар байна. Түүнд хийсэн ШШҮХ-ийн шинжилгээгээр "хөнгөн зэргийн гэмтэлтэй" болох нь тогтоогджээ. Тиймээс ГБХЗХГ-аас хүүд эмнэлэг болон хуульзүйн зөвлөгөө өгч ажиллаж байгаа аж. 10 настай М хүү нэг ах, нэг дүүтэй айлын дунд хүү юм.
Улаанбаатар °C 
Сэтгэгдэл (0)
Сэтгэгдэл бичигдээгүй байна