Хөвсгөлд 55.1 сая төгрөгийн үнэ бүхий 15 үхрийг хулгайлж, худалдсан хэргийг шалгаж байна

Хөвсгөл аймгийн нутаг дэвсгэрт бэлчээрт байсан 25 сарлаг хулгайд алдагдсан гэх дуудлага, мэдээлэл цагдаагийн байгууллагад бүртгэгджээ.

Шалгалтын ажиллагаагаар Б, Н нар бүлэглэн 55.1 сая төгрөгийн үнэ бүхий 15 үхрийг хашиж маллан, бусдад худалдаж борлуулсан болохыг тогтоосон байна.

Цагдаагийн байгууллагаас хохирогчид есөн үхрийг нь хүлээлгэн өгсөн бөгөөд хэргийг Хөвсгөл аймгийн Цагдаагийн газар үргэлжлүүлэн шалгаж байгаа аж.

Үүнтэй холбогдуулан малчдыг малаа тогтмол хариулгатай байлгах, малын зүс, тамга, тэмдэг зэрэг ялгах шинжийг бүртгэж авах, мал сүргээ хараа хяналтгүй орхихгүй байхыг цагдаагийн байгууллагаас анхаарууллаа.

Мөн махны эрэлт нэмэгддэг энэ үед малын хулгайгаас урьдчилан сэргийлж, сэжигтэй хүн, тээврийн хэрэгсэл ажиглагдвал цагдаагийн байгууллагад нэн даруй мэдэгдэхийг сануулжээ.