Оюу толгойн ногдол ашгийг зарцуулах хуулийн төслөө Засгийн газар татан авлаа

Засгийн газар Оюутолгойн ногдол ашгаас хоёр их наяд төгрөгөөр ДЦС-VI болон 10 аймгийн дулааны станц зэрэг дэд бүтцийн төсөл санхүүжүүлэхээр боловсруулсан хуулийн төслөө УИХ-аас татан авлаа.

Өнөөдөр Ерөнхий сайд Н.Учрал "Оюутолгойн ногдол ашгийг 2037 оноос өмнө авах боломжгүй байсан ч хэлэлцээрийн үр дүнд 2027 оноос олгох нөхцөлийг баталгаажуулсан. Засгийн газар 2027 онд Оюутолгойгоос гурван их наяд төгрөгийн ногдол ашиг авахаар тооцсон.  Үүнээс нэг их наяд төгрөгийг Хуримтлалын санд төвлөрүүлж, үлдсэн хоёр их наяд төгрөгийг эрчим хүч, боловсролын салбарын төсөлд зарцуулах санал гаргасан байна. Гэвч УИХ-ын байнгын хороодын хэлэлцүүлгийн үеэр төслийн талаар 235 зарчмын зөрүүтэй санал гарсан тул Засгийн газар хуулийн төслөө татан авлаа." гэв.

Оюутолгойн ногдол ашгийг авах асуудлыг орхигдуулаагүй. Хэмжээ, хуваарилалтыг эцэслэн тохиролцсоны дараа Хуримтлалын санд төвлөрүүлж, эрүүл мэнд, боловсрол, орон сууцны чиглэлд зарцуулна. Ногдол ашгийг иргэдэд бэлэн мөнгөөр тараахгүй бөгөөд ингэхийн тулд холбогдох хуульд өөрчлөлт оруулах шаардлагатайг онцоллоо.