УНААЧ ХҮҮ ХОХИРСОН ХЭРГИЙГ ЦАГДААГИЙН БАЙГУУЛЛАГА ШАЛГАЖ ЭХЭЛЖЭЭ

Өчигдөр болсон Төв аймгийн Баянчандмань сум дахь овооны наадмын дараа уяачдаа зодуулсан хүүгийн талаар бид мэдээлсэн. Хүүгийн гар хугацрсан бөгөөд толгой, нураандаа гэмтэл авсан байж болзошгүй тул нарийн шинжилгээ хийлгэхийг эмч зөвлөсөн боловч мөнгөгүй учир уг шинжилгээг хийлгэж чадахгүй байгааг ч мөн мэдээлсэн.

Тэгвэл хүү өнөөдөр ээжтэйгээ ГССҮТ-д дахин ирж үзүүлсэн бөгөөд албан ёсоор цагдаагийн байгууллагад одоог хүртэл өргөдөл гомдлоо өгч чадаагүй яваа юм байна. Хүүгийн ээж группт байдаг, бичиг үсэг мэддэггүй байна.

Харин манай сайтад хүүхэд хүчирхийлэлд өртсөн талаарх мэдээлэл гарсны дагуу ГБХЗХГ хүүг хайсан боловч олоогүй байгаа аж.

Харин Төв аймгийн Баянчандмань сумын цагдаагийн хоёр алба хаагч энэ асуудлаар хэрэг нээн шалгаж эхэлсэн бөгөөд ГССҮТ-д хүүд үзлэг хийсэн эмчээс болон өчигдөр хүүг гэртээ хонуулсан айлаас мэдүүлэг авч, хэргийг шалгаж эхэлжээ. Мөн хүүгээр морио унуулсан, зодсон гэх М гэгчийг хайж байгаа юм байна.

Насанд хүрээгүй хүүхдийн биед халдсан, хүчирхийлсэн, хөдөлмөрийн мөлжлөгийн гэмт хэрэгч байж болох энэ асуудлын талаарх мэдээллийг бид үргэлжлүүлэн хүргэх болно.