Б.ТОДЗАЯА ДАВЖ ЗААЛДАХ ШАТНЫ ХУРАЛД 2 ӨМГӨӨЛӨГЧ НЭМЖ АВЧЭЭ

Өнгөрсөн гуравдугаар сард Б.Тодзаяа гэгч гэр бүлийн хүчирхийлэл үйлдэж, 4, 6 настай дагавар хөвгүүдээ зодож, тамласан хэрэг гарсан. Хүчирхийллийн улмаас дөрвөн настай хүү ухаангүй гурав хонож, есөн удаагийн хүнд хагалгаанд орсон юм.

Б.Тодзаяад холбогдох эрүүгийн хэргийн анхан шатны шүүх хурал өнгөрсөн тавдугаар сард СХД-ийн Эрүүгийн хэргийн анхан шатны шүүхт болж, хаалттай хорих ангид 10 жил ял эдлэх, гурван сая 160 мянган төгрөгийн хохирол барагдуулах шийхийн шийдвэр гарсан. Тэгвэл Б.Тодзаяа шүүхийн шийдвэрийг үл хүлээн зөвшөөрч нийслэлийн Давж заалдах шатны шүүхт хандсан бөгөөд уг хурал энэ сарын 1-ний өдөр болсон байна.

Давж заалдах шатны шүүх хуралд орохын өмнө ялтан Б.Тодзаяа хоёр өмгөөлөгч нэмж авсан бөгөөд, нийт гурван өмгөөлөгчтэй болсон байна. Харин яг давж заалдах шатны хуралд нэмж авсан хоёр өмгөөлөгчийн нэг нь ирээгүй бөгөөд хуучин өмгөөлөгч, нэг шинэ өмгөөлөгчийн хамт хуралд оролцсон байна. Давж заалдах шатны шүүх бүрэлдэхүүн хэргийг хянаж үзээд анхан шатны шүүхийн шийдвэрийг хэвээр баталжээ.

Тодруулбал, Б.Тодзаяа нь хаалттай хорих ангид 10 жил ял эдлэх бөгөөд тэрбээр улсын Дээд шүүхэд хандах эрх нь нээлттэй бий.