​МАК ХБ-АААС АВСАН 166,5 ТЭРБУМАА ТӨЛЖ ЧАДАХГҮЙ НАЙМАН УДАА ХУГАЦААГ НЬ СУНГАЖЭЭ​

"МАК цемент" ХХК нь 2014 онд ЗГ-ын тогтоолоор Хөгжлийн банкнаас 166,5 тэрбум төгрөгийг жилийн 8,34-9,88 хувийн хүүтэй зээлсэн байдаг. МАК таван жилийн дотор энэхүү зээлээ төлж чадахгүй эргэн төлөлтөнд зөрчил үүсч нийтдээ найман удаа хугацаа сунгасан нь Хөгжлийн банканд явуулсан шалгалтаар тогтоогджээ. Тус компанийн зээлийн төлөлтийн хугацааг нийтдээ найман удаа сонгосон боловч зээлийн үндсэн төлбөр 166,5 тэрбум төгрөг, үндсэн хүүгийн төлбөр 34,6 тэрбум төгрөг, торгуулийн хүүгийн төлбөр 1,7 тэрбум төгрөг буюу нийтдээ 203,1 тэрбум төгрөгийн төлбөрийг хугацаандаа төлж барагдуулаагүй байна. Тиймээс ЗГ-аас байгуулсан ажлын хэсгээс дүгнэлт гаргасан аж. Тодруулбал дахин сунгах хүсэлтийг хүлээн авч шийдвэрлэсэн зээлийн удирдлагын хорооны 2018 оны 12-р сарын 27-ны өдрийн 201885 дугаартай дүгнэлтийг хүчингүй болгож хугацаандаа төлж барагдуулаагүй 203,1 тэрбум төгрөгийн төлбөрийг нэн яаралтай төлүүлэх арга хэмжээ авч ажиллахыг Хөгжлийн банкны ТУЗ болоод гүйцэтгэх удирдлагад даалгалаа.

Н.ӨНӨРЦЭЦЭГ