ТАЛИЙГААЧ ЦЭРЭГ ТЭМЭЭ АВЧРАХААР ЯВААД ЭРГЭЖ ИРСЭНГҮЙ

Сүхбаатар аймгийн Онгон суманд байх Хилийн цэргийн 0184-р ангийн алба хаагч Б өчигдөр амиа алдсан талаар бид мэдээлсэн. Энэ талаар Хил хамгаалах ерөнхий газраас тодруулга, мэдээлэл авахаар хандсан ч бидэнд ямар нэгэн мэдээлэл өгөөгүй юм.

Тэгвэл эх сурвалжийн мэдээллээр талийгаач Б бусад гурван алба хаагчийн хамт тэмээ авчрахаар явсан байна. Тэмээгээ олоод бусдыгаа "аваад ир" хэмээн явуулаад, эргээд ирэх зуур нь жижигхэн бутнаас өөрийгөө боомилж нас барсан байсан гэх мэдээллийг цэргийн ангийнх нь зүгээс ар гэрийнхэнд нь өгч байгаа юм байна.

Гэвч ар гэрийнхнийх нь зүгээс "Саяхан болсон тангарагийн баярын үеэр очиход маш өндөр сэтгэгдэлтэй. Цэргийн алба хааж байгаадаа тун баяртай байсан. Өөрийнхөө амийг егүүтгэсэн гэдэгтэй нь санал нийлэхгүй байна" гэж байна. Бид энэ хэргийн талаар болон Батлан хамгаалах салбарт амиа алдсан, эрүүл мэндээрээ хохирсон алба хаагчдын мэдээллийг сурвалжлан хүргэх болно.