ШИВЭЭ ХҮРЭН-СЭХЭ БООМТООР ӨДӨРТ 1000 МАШИН НЭВТРҮҮЛНЭ

Монгол Улсын сайд, Засгийн газрын Хэрэг эрхлэх газрын дарга Г.Занданшатар БНХАУ -ын ӨМӨЗО-д айлчлал хийж байна. Тэрээр өчигдөр ӨМӨЗО-ы Ардын төлөөлөгчдийн Их хурлын Байнгын хорооны дарга Ли Жихентэй уулзжээ. БНХАУ-тай найрсаг харилцаа, хамтын ажиллагааг хөгжүүлэх нь Монгол Улсын гадаад бодлогын тэргүүлэх чиглэл гэдгийг Г.Занданшатар сайд уулзалтын эхэнд дурдаад хоёр талын харилцаа, хамтын ажиллагаа, түүний дотор Монгол Улс, ӨМӨЗО хоорондын харилцаа, хамтын ажиллагааны өнөөгийн байдалд үнэлэлт, дүгнэлт өгч, 2017-2018 онд хэрэгжсэн өндөр, дээд түвшний айлчлал, уулзалтуудын үеэр тохирсон асуудлуудыг урагшлуулах, үр дүн, ахиц гаргах зорилготой айлчлал хийж байгаагаа тэмдэглэсэн байна.

Монгол Хятадын харилцаа, хамтын ажиллагаа, тэр дундаа ӨМӨЗО-той худалдаа, эдийн засгийн хамтын ажиллагаа тасралтгүй өргөжин хөгжиж ирсэн. Монгол Хятадын худалдааны хэмжээ 2017 онд 6,7 тэрбум ам.долларт хүрсэн. Үүнээс ӨМӨЗО-той хийсэн худалдааны хэмжээ 4,2 тэрбум ам.долларт хүрч, өмнөх оны мөн үеэс 42,4 хувиар өссөн. Энэ нь Монгол Хятадын нийт худалдааны 70 орчим хувийг эзэлж байгаа бөгөөд 2020 онд 10 тэрбум ам.долларт хүргэх зорилтыг хэрэгжүүлэхэд ӨМӨЗО-той хийх худалдаа, эдийн засгийн хамтын ажиллагааг өргөжүүлэх нь голлох үүрэгтэй гэдэгт хоёр тал санал нэгджээ.

БНХАУ-ын дарга Ши Жиньпинийн дэвшүүлсэн "Бүс ба зам" санаачилгын хүрээнд хэрэгжих "Монгол-Орос-Хятадын эдийн засгийн коридор байгуулах" хөтөлбөрийг амжилттай хэрэгжүүлэх, үүнд тусгагдсан төсөл, хөтөлбөрүүдийг бодит ажил хэрэг болгох талаар мөн ярилцлаа. Засгийн газрын Хэрэг эрхлэх газрын дарга Г.Занданшатар БНХАУ-ын ӨМӨЗО-д хийж буй айлчлалынхаа үеэр Шивээ хүрэн-Сэхэ боомтоор 10 дугаар сарын 5-наас эхлэн 1000 машин гарч байхаар тохиролцжээ.