ХҮҮХДИЙН МӨНГИЙГ 100 ХУВЬД ОЛГОХ БОЛОМЖГҮЙ ГЭЖ ҮЗЭВ

Ерөнхийлөгч Х.Баттулга "Хүүхдийн мөнгө бол халамж биш. Хүн амаа өсгөх гэсэн бодлого юмаа. Тиймээс хүүхэд бүрт өгөх 20 мянган төгрөгийг бүх хүүхдэд олгох Хуулийн төслийг өргөн барьж байна" хэмээн энэ хаврын чуулганаар онцолж хуулийн төсөл өргөн барьсан юм.
Харин Засгийн газрын ээлжит хуралдаанаар хүүхдийн 20 мянгыг 60 хувьд биш нийт хүүхдийн 80 хувьд олгох шийдвэрийг гаргаж, хүүхэдтэй хүн бүрийг баярлуулаад амжсан. Түр хугацаанд зогсолт хийсэн байсан энэ мөнгийг ирэх тавдугаар сарын 01-нээс эхлэн олгохоор болсон юм.

Тэгвэл 0-18 насны бүх хүүхдэд олгох нь зөв гэж дэмжлэг эрсэн Ерөнхийлөгчийн хуулийн төслийг МАН-ынхан хүлээж авахгүй нь. Өчигдөр МАН-ын УИХ дахь бүлэг ээлжит хурлаараа Хүүхдийн мөнгийг 100 хувьд олгох хуулийн төслийг хэлэлцэж, нийтийн хүүхдийн 80 хувьд нь олгох нь зөв гэж үзжээ.

Энэ талаар Бүлгийн дарга Д.Хаянхярваа "Эдийн засгийн өсөлт 5.1 хувийн өсөлттэй гарч байгаа ч өмнө нь авсан өр авлага барагдуулах чиглэлд анхаарч ажиллаж байна. Мөн ОУВС-тай тохиролцсоны хүрээнд нийт хүүхдийн 60 хувьд нь олгож байгаа хүүхдийн мөнгийг 80 хувьд хүргэхээр болсон. Энэ чиглэлээ баримталж ажиллах нь зөв болов уу. Судалгаагаар хүүхдийн мөнгийг 100 хувьд олгож байхад 90 хувь нь авдаг байсан юм билээ. Тиймээс нийт хүүхдийн 80 хувьд нь олгох нь зүйтэй гэж бодож байна" гэжээ.