ЕВРОПЫН ОРНУУДАД ОЛОН ХЭЛ УСТАЖ ҮГҮЙ БОЛОХОД ХҮРЭЭД БАЙНА

Европын орнуудад олон хэл устаж үгүй болоход хүрээд байна. Юнескогоос эдгээр хэлнүүдийг танилцуулсан байна. Тус байгууллагын гаргасан жагсаалтанд 640хэл багтсан байна. Гол шалтаан нь хүүхдүүд эдгээр хэлийг гэртээ эх хэл болгон сурахгүй байгаатай холбоотой гэж Юнескогийн тайланд бичжээ. НҮБ-ын боловсрол, шинжлэх ухаан, соёл урлагийн байгууллага эх хэл гэдэг нь хүүхэд гэртээ эцэг эх, өвөө эмээгээсээ сурч байгаа хэлийг хэлнэ гэж тодорхойлсон байдаг. Герман улсад л гэхэд Сорби хэл, Австри улсад Бургенланд Хорват хэл, Швейцари улсад Роман хэл устах аюулд ороод байгаа бол Итали, ОХУ-уудад хэлний хамгийн олон төрөл зүйлтэй төдийгүй хамгийн олон аюулд орсон хэл байдаг байна. Эдгээр улсуудад шинэ үеийнхэн төрөн гарах бүрт хэлнүүд нь устсаар байгаа юм. Италийн өмнөд хэсэгт байдаг Сардини арал дээр л гэхэд Галлуриз, Сассариз, Алгериз, Каталан болон Сардин зэрэг хэлнүүд устах аюулд ороод байна. Сардиний Каглиари их сургуулийн хэлний судалгааны төв устаж үгүй болоход хүрээд байгаа хэлнүүдийг залуу үеийнхэн хэр их хэрэглэдгийг судалжээ. Уг судалгаанаас харахад залуучуудын 70орчим хувь нь зөвхөн эмээ, өвөөтэйгөө л эдгээр хэлээр ярьдаг бол 33хувь нь хүүхдүүдтэйгээ орон нутгийн аялгаар ярьдаг гэж хариулсан байна. Одоогийн байдлаар Юнескогийн устаж үгүй болсон дэлхийн хэлний шинэ жагсаалтанд 228 хэл нэмэгдээд байна.