ХЯТАДАД ЦАХИЛГААН МОПЕД ТҮРЭЭСИЙН ҮЙЛЧИЛГЭЭ НЭВТЭРНЭ

Хятадын такси дуудлагын тэргүүлэгч апп Диди такси (Didi)цахилгаан мопед түрээсийн бизнест анхаарал хандуулж эхэллээ. Баттай эх сурвалжийн мэдээлж байгаагаар ойрын хугацаанд Хятадын хойд хэсгийн гурван хотод үйлчилгээгээ нэвтрүүлж эхлэх юм байна. Ингэхдээ мопед түрээслэх тусдаа апп гаргахаар төлөвлөсөн. Мопед түрээсийн үйлчилгээ нь Хятадад шинэ зүйл юм. Өнгөрсөн жил л эхэлсэн унадаг дугуй түрээсийн бизнес тус улсад жинхэнэ тэсрэлт болж байна. Диди такси ч энэ бизнестэй салшгүй холбоотой байж, хэд хэдэн хөрөнгө оруулалт хийсэн ба гол апп-даа дугуй түрээсийн хэсгийг ч нэмсэн юм.

Диди такси компанийн үзэж байгаагаар унадаг дугуй түрээслэж хэрэглэгчид ихэвчлэн 1-3 км-ийн зайд л хэрэглэдэг бол цахилгаан мопедыг 2-8 км-т хэрэглэх боломжтой юм. Энэ нь жижиг хотууд болон хотын төвүүдэд илүү тохиромжтой, хэрэглэгчдийн шаардлагыг олон талаар хангасан үйлчилгээ болно гэж санаачлагчид үзэж байна.