УУЦ ЧАНАСАН СУРГУУЛЬ, ЦЭЦЭРЛЭГИЙН УДИРДЛАГЫГ ТОРГОНО

Уламжлалт цагаан сарын баяр болоход сар хүрэхгүй хугацаа үлдээд байна. Цагаан сар гэхээр юуны өмнө ширээн дээр тавих ууцны асуудал "босдог". Ямар ууц тавих вэ, хаана чануулах вэ гээд л асуудал ар араасаа хөвөрнө.Тэгээд л аль нэг цайны газрыг царайчлах юм уу, "ууц чанана" гэсэн зарыг шүүрдэж эхэлдэг. Эрт чануулчихвал хатчихна, хугацаа тулбал үнэ нь тэнгэрт хадчихна гээд зовлон бий. Энэ бүхнийг тооцоолсон овсгоотой зарим нэг нь орон сууцны байрны ойролцоо гэр бариад "Ууц чанана" гэсэн бичиг зүүгээд хөөрхөн бизнес хийчихдэг болоод байгаа. Харин энэ удаад Нийслэлийн мэргэжлийн хяналтын газраас нэгэн санамжийг гаргалаа. Тэр нь "Монголын уламжлалт цагаан сарын баяр болох гэж байгаатай холбогдуулан Ерөнхий боловсролын сургууль, цэцэрлэгийн удирдлагууд сургууль, цэцэрлэгийн гал тогоо, эзэмшил газарт гэр барьж ууц, өвчүү чанаж, жигнэж байгаа нь Монгол улсын Агаарын тухай хуулийн 9.1.7 дугаар зүйл, Боловсролын тухай хуулийн 42.5 дугаар зүйл, Эрүүл ахуйн тухай хуулийн 7.4 дүгээр зүйл, Хүнсний аюулгүй байдлыг хангах тухай хуулийн 6.5.1 дүгээр зүйлийн холбогдох заалтыг зөрчиж байна. Иймд Боловсролын байгууллагын удирдлагууд дээрхи хууль тогтоомжийг зөрчсөн тохиолдолд Монгол улсын Зөрчлийн тухай хуулийн 7.4, 6.17, зүйлийн 9 дүгээр заалтын дагуу учруулсан хохирол, нөхөн төлбөрийг гаргуулах, үйл ажиллагааг зогсоож, хүнийг тавин нэгжтэй тэнцэх хэмжээний төгрөгөөр, хуулийн этгээдийг таван зуун нэгжтэй тэнцэх хэмжээний төгрөгөөр торгох арга хэмжээ авахыг үүгээр мэдэгдэж байна" гэжээ. Ингэхээр сургууль, цэцэрлэгийн гал тогоонд ууц чанасан тохиолдолд, тэр нь "баригдвал" торгуулахаар болж байгаа юм байна. Харин хувь хүмүүсийг яах нь тодорхойгүй байна.