ГУРАВ ХОНОГИЙН ДАРАА 50 МЯНГАН ТӨГРӨГ ОРНО

Засгийн газраас баталсан журмын дагуу жирэмсэн эхийн тэтгэмжийг жирэмсний таван сартайгаас төрөх хүртэлх хугацаанд сар бүр 40 мянга, 0-3 хүртэлх насны хүүхэд асарсны тэтгэмжийн хэмжээг сар бүр 50 мянган төгрөг олгох юм. Одоогоор энэхүү хөтөлбөрт 135 мянган эхийг хамруулах судалгаа гарсан юм. "Цалинтай ээж" хөтөлбөр энэ сарын 20-ноос хэрэгжиж эхлэх юм байна. Өөрөөр хэлбэл, хүүхдээ харж буй ээж таны дансанд гурав хоногийн дараагаас 50 мянган төгрөг орох нь ээ гэсэн үг юм.

Хөтөлбөрт хамрагдах хүсэлтэй жирэмсэн ээжүүд өргөдөл, нэг хувь зураг, иргэний үнэмлэх, хуулбарын хамт, баг, хорооны Засаг даргын тодорхойлолт, жирэмсэн үедээ эмнэлгийн хяналтад орсон тухай өрх, сум, тосгоны эрүүл мэндийн төвийн эмчийн тодорхойлолтыг бүрдүүлэх ёстой юм.Харин 0-3 хүртэлх насны хүүхдээ асарч буй ээжүүд өргөдөл, нэг хувь зураг, иргэний үнэмлэх, хуулбарын хамт, хүүхэд эсэн мэнд бойжиж байгаа тухай өрх, сум, тосгоны эрүүл мэндийн төвийн эмчийн тодорхойлолт, хүүхдийн төрсний гэрчилгээ, хуулбарын хамт, хүүхэд асрах чөлөө олгосон тухай ажил олгогчийн тушаал, хуулбар болон баг, хорооны Засаг даргын тодорхойлолтыг бүрдүүлнэ.