ИХ ХЭМЖЭЭНИЙ ГАЗРЫН ТОС АЧИЖ ЯВСАН ХӨЛӨГ ШАТЖЭЭ

Шанхайн эргээс 260 км-ийн зайд газрын тос ачиж явсан хөлөг онгоц шатжээ. Панамын тугтай Санчи хөлөг онгоц Иранаас Өмнөд Солонгос руу газрын тос ачиж явах замдаа АНУ-аас тариа ачиж явсан Хонг Конг-д бүртгэлтэй CF Кристал хөлөгтэй мөргөлдсөн юм. Хөлгийн багийн гишүүд болох 30 Иран, 2 Бангладеш иргэн ор сураггүй болоод байна. Аврах багийнхан нэг цогцос олсон ч хэн гэдгийг нь тодорхойлоогүй байгаа юм.

Ослоос үүдэж их хэмжээний газрын тос асгарсан нь асар их хор хөнөөл учруулах айдас дагуулаад байна. Хэр их хэмжээний газырн тос асгарсан болон ямар хэмжээний хор хохирол дагуулах нь одоогоор тодорхойгүй ч Санчи хөлөг онгоц 136 мянган тонн ультра лайт хэлбэрийн газрын тос ачиж явсан нь жирийн хүнд газрын тосноос хэд дахин илүү, гамшиг авчрах хэмжээний хор нөлөөтэй юм.

"Энэ хэлбэрийн газрын тос нь уурших, устай урвалд орох магадлал ихтэй" гэж JTD Energy Services компанийн Жон Дрисколл мэдэгдэж байна. Хятадын Шиньхуа агентлагт мэргэжилтнүүд "Эрэг дагуу маш их хэмжээний газрыг хоромхон зуурт үхүүлэх чадвартай" гэж ярьжээ.

Хятад улс аврах ажиллагаа, ослоос хор хөнөөлийг тооцох, арилгах арга хэмжээг өргөн фронтоор авч байна. Америкийн тэнгисийн флотынхон цэргийн хөлөг, аврах баг илгээгээд байгаа бол Өмнөд Солонгосын эргийн хамгаалалтын хөлөг, туслах хүч ч хамтарч байна.