ДОЛООН НАСТАЙ ХҮҮГЭЭ ХЭВТЭРТ ОРТОЛ ЗОДСОН ХЭРЭГ ГАРЧЭЭ

Сүхбаатар дүүргийн нутаг дэвсгэрт өнгөрсөн арванхоёрдугаар сарын 06-нд долоон настай хүүгээ түрүүвчнээс мөнгө хулгай хийсэн гэх шалтгаанаар биед нь хүнд гэмтэл учруулж, хэвтэрт ортол нь зодсон аймшигт хэрэг гарсан билээ. Хэргийг тодруулбал, хойд эцэг нь түрүүвчнээс 300 төгрөг хулгай хийсэн байсан. Тиймээс хашраах зорилготой зодсон. Хүүхдээ зодож шийтгэж хүмүүжүүлдэг биздээ гэж мэдүүлжээ.

Харин төрсөн ээж нь хүүгээ худлаа баашилж уналаа хэмээн загнаж харааж, улмаар хөл дээр нь босгож зогсоож байгаад нөхрөөрөө зодуулсан байна. Энэхүү хэргийг доод айлынх нь эмэгтэй мэдсэнээр цагдаад мэдэгдэж, яаралтай түргэн тусламж дуудаж хүүхдийг ГССҮТ-д хүргэсэн байгаа юм. Хүүгийн хувьд толгой нь хагарч, зөөлөн эдийн гэмтэл их авсан байсан талаар анх тусламж үзүүлсэн эмч нь ярьжээ.

Тэгвэл долоохон настай нялх хүүхдээ харгислан зодож тамласан эцэг, эх хоёрыг Сүхбаатар дүүргийн цагдаагийн хэлтсээс эрүүгийн хэрэг үүсгэн гадуур шалгаж байцааж байгаа юм байна. Ийнхүү гэр бүлийн хүчирхийлэл үйлдэгчдийг шинээр хэрэгжиж эхэлсэн Эрүүгийн хуулиар хариуцлага хүлээлгэнэ гэдгийг албаны эх сурвалж хэллээ.