“ГАРДИАН”: МОНГОЛЧУУДАД ЭЛЭГНИЙ ХОРТ ХАВДРЫН ХЯМРАЛ НҮҮРЛЭЖЭЭ

Их Британийн алдарт "Гардиан" сонинд "Монголд нас баралтын 15 хувийг элэгний хатуурал, хорт хавдар эзэлж байна. Энд элэгний хорт хавдрын хямрал нүүрлэж байна. Гурван сая иргэний 400 мянга нь гепатит вирустай гэж оношлогджээ. Дэлхийд ийм хэцүү асуудалтай улс байхгүй" хэмээн нийтэлжээ. Мөн Монгол Улсын Засгийн газраас 2020 он хүртэл элэгний хорт хавдрыг бууруулахаар 226 тэрбум төгрөг төсөвлөсөн хэмээн бичжээ. Ийнхүү Монголчуудыг сөхрүүлж буй элэгний хорт хавдрыг олон улсын хэвлэлүүд онцолж байна.

Манай улс элэгний хорт хавдрын нас баралтаар дэлхийд нэгдүгээрт ордог төдийгүй өвчлөлийн тоо дэлхийн дунджаас найм дахин их байгаа нь үнэхээр өр өвтгөсөн баримт юм. Өндөр хөгжилтэй орнуудад төрийн бодлогоор зарим төрлийн хавдруудаас урьдчилан сэргийлэх хөтөлбөрүүдийг хэрэгжүүлж, бүх хүн амаа бүрэн хамруулж, эрт үе шатанд нь илрүүлдэг туршлага бий. Манайд элэгний өвчлөлийн оношлогоо, эмчилгээг боловсронгуй болгох шаардлага тулгарч байна.