РОБОТОД ДУРЛАЖ, АМЬДРАЛЫНХАА ХАНИАР СОНГОЖЭЭ

Хайр дурлал бол юугаар ч барьж дийлэхгүй сэтгэлийн агуу их хүч юм. Үүнийг батлах хүмүүс дэлхий дээр цөөнгүй байдаг бололтой. Саяхан Лили хэмээх франц бүсгүй 3D принтерээр хэвлэсэн "Inmmovator" хэмээх роботод дурлаж, хамт амьдрах болсноо зарлажээ. Хэрэв Францад роботтой гэрлэхийг хуулиар зөвшөөрвөл Лили хуримаа хийхэд ч бэлэн байгаа ажээ. Энэ бүсгүй жирийн эрчүүдийг огтхон ч сонирхдоггүй бөгөөд өөрийгөө робо-сексуал хэмээн тодорхойлсон байна. Тэрээр анх 19 настай байхдаа роботуудын дуу хоолойнд татагдаж эхэлсэн гэнэ.

Түүний энэ этгээд сонголтыг гэр бүл, найз нөхөд нь хамгийн их ойлгож дэмждэг ажээ. Лили "Робот хэнийг ч шархлуулж, уйлуулдаггүй. Бид хамтдаа үнэхээр жаргалтай байгаа. Энэ бол ямар ч гаж эмгэг биш. Зүгээр л хайр дурлалын шинэ урсгал" хэмээн хэвлэлд өгсөн ярилцлагадаа онцолсон байна. Хиймэл оюун ухааны тэргүүлэх мэргэжилтэн Дэвид Леви 2050 онд хүмүүс роботтой гэрлэх явдал түгээмэл болно гэж дүгнэсэн нь ийнхүү биеллээ олж эхэллээ.