КАЛИФОРНИД ХАР ТАМХИНЫ ХЭРЭГЛЭЭГ ХУУЛИАР ЗӨВШӨӨРӨВ

АНУ-ын хамгийн том муж болох Калифорнид каннабис буюу олсны ургамлыг зугаа, цэнгэлийн зорилгоор хэрэглэхийг хуулиар зөвшөөрлөө. 2018 оноос эхлэн тус мужийн 21-ээс дээш насны иргэд зургаан төрлийн мариуханы ургамлыг гэртээ тарьж, 28 грам каннабис хадгалах эрхтэй болжээ. Гэхдээ жолоо барьж байхдаа хар тамхи хэрэглэхийг хориглож, сургууль, цэцэрлэг, олон нийтийн газраас 300 метрийн зайд татаж байхаар хуульд тусгасан байна.

1996 онд Калифорнид түүхэнд анх удаа марихуаныг эмчилгээний зорилгоор хэрэглэхийг зөвшөөрч байжээ. Харин одоо насанд хүрэгчдэд бага тунгаар хэрэглэхийг зөвшөөрснөөр 100 гаруй жижиглэнгийн дэлгүүр каннабис борлуулах эрхээ авчээ.

Шүүмжлэгчид уг хуулийг залуу үеийнхний хар тамхины хэрэглээг нэмэгдүүлж, нийгэмд сөрөг үр дагавар авчирна гэж үзэж байгаа бол бизнесийн нүдээр харвал ирэх жилүүдэд улсын төсөвт олон тэрбум долларын хөрөнгө оруулалт авчирна гэж эрх баригчид мэдэгдэв.

Мэргэжилтнүүдийн тооцоолж буйгаар хууль бус каннабисын зах зээлийг дагаад 5,1 тэрбум долларын хөрөнгө эргэлдэж байдаг ажээ. Тиймээс уг хуулийг баталснаар хууль бус зах зээлийг хумьж, албан ёсны зөвшөөрөлтэй цэгүүдээр борлуулснаар татварын орлогод жилд дунджаар 1тэрбум доллар төвлөрнө гэж тооцжээ.

Каннабис нь марихуан, гашиш, гашишийн баяжмал буюу тос зэрэг гол нэрийн бүтээгдэхүүнийг гаргаж авах үндсэн түүхий эд болдог юм. Каннабисыг татаж хэрэглэсний дараах 10-30 минутад сэтгэцэд шууд нөлөөлдөг байна.