ШАТАХУУН ИМПОРТЛОГЧИД БОРЛУУЛАЛТДАА НЭГДСЭН БАЙДЛААР ХЯЗГААРЛАЛТ ХИЙЖЭЭ

"Шинэ он гарангуут шатахууны үнэ өснө. Авто машинаа сайн цэнэглээд аваарай" гэсэн мессэж түгэх болсоор нэлээд удав. Баттай эх сурвалжийн мэдээлж буйгаар, шинэ он гарахаас өмнө шатахуун импортлогчид уулзаж, 2018 оны эхнээс литр тутмыг нь дор хаяж 100 төгрөгөөр нэмэхээр тохирчээ. Яг энэ мэдээллийг батлах гэсэн мэт дөрвөн өдрийн турш үргэлжилсэн амралтын өдрүүдэд ШӨХТГ-аас явуулсан гэнэтийн шалгалтад ШТС-ууд бүдэрлээ.Шалгалтаар "Магнай трейд", "Сод монгол", "Тэс пэтролиум" ХХК-иудын зүгээс зарим авто бензин болон дизель түлшний борлуулалтдаа хязгаарлалт хийсэн нь илэрчээ. Уг нь 2017 оны арванхоёрдугаар сарын 26-ны өдрийн байдлаар улсын хэмжээнд дунджаар ердийн хэрэглээний 38 хоногийн нөөцтэй байв. Үүнийг нарийвчилбал, Аи-80 автобензин 68, Аи-92 автобензин 46, дизелийн түлшний 28 хоногийн нөөцтэй байсан. Өнгөрсөн арваннэгдүгээр сард ОХУ-ын зүгээс шатахуун импортдоо бага зэргийн хязгаарлалт тавьсан. Гэсэн хэдий ч нөөцийн хувьд харьцангуй тогтмол үзүүлэлттэй байгааг албаны хүмүүс тодотгож байна.