ИХ БРИТАНИЙН НЭРТЭЙ БИЗНЕСМЭН ШИНЭ ЖИЛИЙН БАЯРААР АМИА АЛДЖЭЭ

Их Британийн "Compass" группийн гүйцэтгэх захирал Ричард Кузенс шинэ жилийн баяраа Австралидтэмдэглэхээр хувийн онгоцоор нисч яваад амиа алджээ. Онгоцонд зорчиж явсан Ричард Кузенсийн гэр бүлийн дөрвөн хүн, нисэгч бүгд нас барсан байна. Австралийн Зам тээврийн аюулгүй байдлын товчоо энэхүү харамсалтай ослын шалтгааныг илрүүлэхээр мөрдөн байцаалт явуулж байгаа ажээ. "Compass" групп нь 31 тэрбум долларын хөрөнгөтэй, дэлхийн 50 гаруй оронд хагас сая ажилтан, албан хаагчтай бөгөөд сургууль, хорих анги, олон үндэстний компаниудад төрөлжсөн хоол хүнс нийлүүлдэг томоохон үйлдвэрлэгч юм. 58 настай Ричард Кузенс нь тус компанид 11 жил ажиллахдаа Европ дахь салбарыг амжилттай удирдаж байжээ. Тэрээр өмнө нь "Tesco" супермаркет, "BPB" барилгын материалын корпорациудад амжилттай ажиллаж,дэлхийд танигдсан юм. Түүнийг "Financial Times" сонин бизнесийн салбарын томоохон тоглогч хэмээн үнэлж, 2017 оны дэлхийншилдэг 11 захирлын нэгээр нэрлэж байжээ.