ШАТАХУУНЫ ҮНЭ ИРЭХ ОНЫ ЭХНИЙ ӨДРӨӨС НЭМЭГДЭНЭ

Шатахууны онцгой албан татвар 2018 оны эхний өдрөөс эхлэн нэмэгдэж байгаа билээ. Үүнтэй холбоотойгоор бензин шатахууны үнэ 50 хүртэлх төгрөгөөр нэмэгдэх талаар эх сурвалж мэдээлэв.

Түүнчлэн 2017 он гарснаас хойш брент газрын тосны ханш найман хувиар өсч, 63 ам.доллар даваад байгаа. Арваннэгдүгээр сарын эхний долоо хоногт таваарын ханш 64 ам.доллар давж сүүлийн хоёр жилийн оргилд хүрч байсан юм. Өнгөрсөн сард АНУ-ын занарын олборлолт 7.1 сая баррель давж, түүхэн дээд түвшинд хүрсэн юм. Ийнхүү АНУ-ын олборлолт эрчимжсэн газрын тосны ханшийн өсөлтийг нэг түвшинд барихад хүргэсэн билээ.

ОПЕК болон ОХУ-ын тал газрын тосны гарцаа танах хөтөлбөрөө ирэх оны эцэс хүртэл сунгахаа зарласан. Ингэснээр үргэлжлүүлэн олон улсын зах зээл дэх нийлүүлэлтийг бууруулж, ханшийн өсөлтийг хадгалах зорилт тавиад байгаа юм. ОПЕК-ийн зүгээс гаргасан шийдвэртэй холбоотойгоор газрын тосны ханш өсөхөд нөлөөлсөн. ОПЕК-ийн зүгээс ирэх онд буюу 2018 онд газрын тосны ханш тогтвортой, жигд байдлаар өсөх хандлагатай байгааг мэдэгдээд байгаа.

Энэ нь манай улсад бензин, шатахууны үнэ нэмэгдэхээс аргагүйд хүргэх нь ойлгомжтой. Ингэхдээ АИ92 болон 80 бензинийг литр тутамд нь 40 төгрөгөөр, дизель түлшийг литр тутамдаа 50 төгрөгөөр нэмэх товтой байгаа юм. Гэхдээ энэ бол өнөөдрийн нөхцөл байдалд нийцүүлж буй үнэ биш гэдгийг эх сурвалжууд хэлсэн. Засгийн газартай тодорхой ойлголцолд хүрч чадахгүй бол 50-100 төгрөгөөр нэмэх аж.