АГААРЫН ТЭЭВРИЙН КОМПАНИЙН СУРТАЛЧИЛГАА ШҮҮМЖЛЭЛД ӨРТӨВ

Вьетнамын "VietJet Air" агаарын тээврийн компанийн 2018 оны сурталчилгааны календарт усны хувцастай бүсгүйчүүд зургаа авахуулжээ. Эдгээр бүсгүйчүүд нь тус компанийн онгоцны үйлчлэгч, зорчигчид биш Америк, Тайландын алдартай загвар өмсөгчид ажээ.

Тиймээс агаарын тээврийн компанийн үйлчилгээтэй ямар ч холбоогүй, хэт задгай, секс сурталчилгаа хийсэн нь ёс зүйд үл нийцнэ хэмээн Хятадын хэвлэлүүдэд шүүмжлэв. "VietJet Air" компани нь Хонконгоос Хо Ши Минг хот хүрэхээс гадна дотоодын 23, олон улсын 10 нислэг үйлддэг байна. Гэтэл зорчигчдыг өөртөө татах гэж ийм сурталчилгаа хийсэн биш зарим нислэгийг нь цуцалж магадгүй болсон гэнэ. Сурталчилгаанд усны хувцастай охид зорчигчдын суудал, тэр ч бүү хэл нисэгчийн бүхээгт аальгүйтэх нь аюулгүй, чанартай, найрсаг үйлчилгээг огтхон ч илэрхийлж чадахгүй хэмээн шүүмжлэгчид үзэж байна.

Сонирхуулахад, энэхүү компани нь Вьетнамын дотоодын нислэгийн 40 хувийг дангаараа гүйцэтгэдэг бөгөөд хямд тийзээрээ үйлчлүүлэгчдийг өөртөө татдаг байна. Компанийн гүйцэтгэх захирал, ерөнхийлөгч Нгуен Ди Дуон Дао нь 1,8 тэрбум долларын хөрөнгөтэй зүүн өмнөд Ази дахь цорын ганц эмэгтэй тэрбумтан юм.