ХЯТАДУУД РОБОТ, УХААЛАГ ТЕХНОЛОГИЙН САЛБАРТ ТЭРГҮҮЛНЭ

Хятадын эрх баригчид гурван жилийн төлөвлөгөө баталж, 2020 он гэхэд дэлхийд ухаалаг технологиор тэргүүлэх зорилт тавьжээ. Тэд ухаалаг автомашин, робот, өндөр хурдны галт тэрэг зэрэг технологийн тэргүүлэх есөн салбарыг хөгжүүлснээр эдийн засгийнхаа өрсөлдөх чадварыг нэмэгдүүлнэ гэж үзэж байгаа ажээ. Тэд удахгүй 600 км/цагийн хурдтай галт тэрэг, дэвшилтэт хөдөө аж ахуйн машин техник, эм, эмнэлгийн хэрэгсэл, тоног төхөөрөмж зохион бүтээх нь ээ.

Эх сурвалжаас үзвэл, Хятадын ухаалаг технологи сүүлийн жилүүдэд түргэн хөгжиж, аж үйлдвэрийн робот, үйлчилгээний робот зэрэг шинжлэх ухаан технологийн бүтээгдэхүүн өргөн хэрэглээнд орсон байна. Хятадын зах зээл дэх аж үйлдвэрийн роботын борлуулалт 54%-иар нэмэгдэж, 56 мянган ширхэгт хүрсэн байна.

Түүнчлэн Хятадын ухаалаг автомашины зах зээл Европ, Америкаас илүү хөгжиж байгаа гэнэ. Хятад улс даяар шинэчлэл, шинжлэх ухааны томоохон 156 паркийг бий болгосон бөгөөд шинжлэх ухаан, технологи, инновацийн салбарт 30 сая хүн ажиллаж байдаг ажээ. Дэлхийн улс орнуудад ахиад 2.65 сая хятад хүн энэ салбарт ажиллаж сурч боловсорч байгааг нэг бүрчлэн эргүүлэн татаж зорилготой ажиллаж буй аж. Инновацийн хөгжилд 1980 оноос хойш төрөгсөд түүчээлж, ирээдүй болно хэмээн харж байгаа тул улсаас тэдний хөгжил, боловсрол, ажиллах амьдрах орчинд онцгойлон анхаарч байгаа талаар мөн дурдаж байна лээ.