ЕСӨН НАСТАЙ ОХИН ШИНЭ ЖИЛИЙН МӨНГӨӨ ЯДУУ ХҮМҮҮСТ ЗОРИУЛАВ

Бусад хүүхэд ээж, аавынхаа өгсөн мөнгийг дэлгүүр хэсэж зарцуулдаг бол есөн настай Молли МакГинли охин буяны байгууллагын ажилтнуудтай хамтран орон гэргүй хүмүүст тусалжээ. Бяцхан охины төрсөн өдөр шинэ жилийн баяртай давхацдаг тул ээж нь охиноо баярлуулах гэж мөнгө өгсөн байна. Харин гудамжинд хоол гуйж яваа хүмүүсийг хараад өрөвдсөн охин ээжийнхээ өгсөн баярын мөнгөөр хүмүүст халуун ундаа, шөл авчирч өгсөн байна. Молли "Гадаа хүйтэн байгаа болохоор хөл минь даарч байна. Ээж надад хүрэм аваарай гэж мөнгө өгсөн ч зарим хүн хоол ч авч чадахгүй байна" хэмээн ярьжээ.

Охины тусалсан хүмүүс дотор Маргарит Стим хэмээх залуу бүсгүй байв. Тэрээр өмнө нь элэг бүтэн сайхан амьдарч, дуучин болохыг мөрөөддөг байсан ч салалтын дараа орон гэргүй болсон байна. Тиймээс амьдрахын эрхээр гудамжид төгөлдөр хуур тоглож, даарч бээрэн хэцүү амьдрал туулж яваа ажээ.