ДАУНЫ СИНДРОМТОЙ ИРГЭДИЙГ ХАМГААЛДАГ БҮСГҮЙ БААТАР БОЛОВ

CNN агентлагийн 2017 оны "Hero of the Year" шагналын эзнээр кофе шоп ажиллуулдаг эгэл жирийн бүсгүй тодорч, 100 мянган долларын хандиваар сайн үйлсийн аянгаа өргөжүүлэхээр болжээ. Эми Врайт хэмээх энэ бүсгүй хөгжлийн бэрхшээлтэй 40 иргэнийг ажлын байраар хангадаг бөгөөд тэдгээрийн дотор дауны синдромтой хүмүүс ч байгаа ажээ. АНУ-д хөгжлийн бэрхшээлтэй иргэдийн 70 гаруй хувь нь ажилгүй байгаа энэ үед Эми Врайтын сайн үйлс олон хүний талархлыг хүлээжээ. Дээрх шагналын эзнийг олон нийтийн санал асуулгаар тодруулахад Эми тодрон гарч ирсэн байна.

Түүний хоёр хүүхэд нь дауны синдромтой учир нийгмийг өөрчлөхөөр шийдсэн нь энэ юм. Кофе шопоо хүүхдүүдийнхээ нэрээр нэрлэж, өөртэйгөө адилхан зовлонтой хүмүүст туслахаар шийдсэн байна. Эми "Би хөгжлийн бэрхшээлтэй хүмүүст амьдралыг сайхнаар хардаг болоход нь тусалмаар байна. Кофе шоп нээвэл тэдэнд хамтдаа ажиллаж, дотоод сэтгэлээ нээж ярилцах сайхан орчин бүрдэх юм байна гэж бодсон. Манай ажилтнууд бусдад үйлчилж байхдаа өөрсдийгөө ямар үнэ цэнэтэй хүмүүс вэ гэдгийг ойлгодог. Дэлхий дээр амьдарч буй 200 сая хөгжлийн бэрхшээлтэй хүн бүр бусдаас юугаараа ч дутуу биш" хэмээн хэвлэлд өгсөн ярилцлагадаа онцолжээ.

CNN агентлаг нь хүмүүнлэгийн сайн үйлсийг дэмжих зорилгоор 2007 оноос хойш эгэл баатруудыг онлайн санал асуулгаар тодруулж байна.