БНХАУ-ИРЭХ ОНД МОНГОЛЫН 24 КОМПАНИАС МАХ ИМПОРТОЛНО

2017 оны эхэнд дотоодын 36 компани мах экспортлох зөвшөөрөл авсан байна. Хэдий тийм боловч шүлхийн тархалтаас үүдэн БНХАУ мах экспортын компаниудад шалгалт хийж зөвшөөрлийг шинэчлэн баталлаа. Ингэснээр БНХАУ-д мах нийлүүлэх зөвшөөрөлтэй компаниудын тоо 24 болж буураад байна.

Шүлхийн хорио цээр тогтоогоогүй бүсээс түүхий мах нийлүүлэх компаниудыг сонгосон аж. Үүнд, Увс аймгийн "Green Grassland", "Бумномин" компани, Завхан аймгийн "Завхан хүнс", "Тэс шим", "Edgs" болон Хөвсгөл аймгийн "Монгол эко" зэрэг зургаан компани багтаж байна. Мөн дулааны аргаар боловсруулсан үхэр, хонины мах нийлүүлэх зөвшөөрлийг "Мах маркет", "Монгол эко", "Хүн од", "Хатан сүйх", "Арго мийт" зэрэг нийслэлийн таван компанид олгосон байна. Хонь, үхрийн махыг ангилан ялгаж бэлтгэн нийлүүлэх зөвшөөрлийг "Мах маркет", "Дархан мийт фүүдс", "Эрдэнэ хүнс" зэрэг таван компанид олголоо.

БНХАУ ирэх онд Монголоос адууны мах түлхүү импортлохоор болсон бөгөөд иймд адууны мах бэлтгэн нийлүүлэх компанийн тоог найм болгон нэмэгдүүлжээ. Битүү туурайт мал шүлхий өвчин тусдаггүй учраас Сэлэнгэ аймгийн "Дорнын говь" компанид адууны мах бэлтгэх зөвшөөрөл олгосон байна. Мөн "Мон Тува", "Мах импэкс", "Дархан мийт фүүд" зэрэг компаниуд адууны мах экспортлох зөвшөөрлөө авчээ. Энэ онд Монгол Улс 26 мянган тонн мах экспортолсноор жилийн дүн гурав дахин өсөөд байгаа юм.