ХЯТАДУУДЫН КЛОНИЙН АРГААР ХУВИЛСАН НОХОЙ МАРГААН ДАГУУЛАВ

Лун Лун хэмээх энэ өхөөрдөм нохой гаднаасаа энгийн мэт харагдах боловч төрсөн цагаасаа хойш цусны бөөгнөрөл буюу тромб өвчнөөр шаналж байна. Учир нь тэрээр генийн өөрчлөлттэй, зүрх судасны өвчтэй донороос хувилж гаргасан дэлхийн анхны нохой юм. Түүнийг Бээжин дэх "Sinogene" хэмээх био технологийн компани клонийн аргаар хувилсан бөгөөд донор болох "Apple" хэмээх өвчтэй нохойн генийн мэдээлэл түүнд агуулагдаж байгаа ажээ.

Хятадын эрдэмтэд нохойнуудыг ажиглан туршсанаар хүн төрөлхтөнд аюул учруулаад буй зүрх судасны өвчнийг эмчлэх аргыг нээх зорилготой ажээ. Учир нь Дэлхийн эрүүл мэндийн байгууллагын тооцоолсноор жилд 17 сая хүн зүрхний өвчнөөр хорвоог орхижээ. Гэвч өвчтэй амьтдыг зохиомлоор үржүүлж, тамлах явдлыг дийлэнх улс орон эсэргүүцэж байна. Ялангуяа аутизмтай хүний генийг сармагчинд шилжүүлж турших, ретро вирустай гахай, хэт том биетэй нохойг олшруулахыг дэндүү ёс зүйгүй үйлдэл гэж үзэж буй юм. Хятадад 20 сая амьтан лабораторийн туршилт болж зовж байдаг гэсэн баримт бий.

Өмнө нь Солонгосын эрдэмтэд анх удаа Их Британийн үүлдрийн нохойг клонийн аргаар хувилсан юм. Эдгээр эрдэмтэд тухайн үедээ үндэсний баатар болж байсан ч ёс суртахуунгүй үйлдэл хийсэн хэмээн багагүй шүүмжлүүлж байв.