ӨСВӨР НАСАНДАА НЭЭЛТ ХИЙЖ, САЯТАН БОЛСОН УХААЛАГ ХҮҮ

Өсвөр насны хүүхдүүдийн дийлэнх нь чөлөөт цагаа кино үзэж, видео тоглоом тоглож, нийгмийн сүлжээгээр зугаалж өнгөрүүлдэг бол АНУ-ын иргэн Жеорж Матус 12 насандаа нисдэг төхөөрөмж зохион бүтээж, бүтээгдэхүүнээ туршиж байжээ. Мөн 18 насандаа дэлхийн хамгийн хурдан нисэгчгүй онгоц зохион бүтээж, суут хүмүүсийн нэг болсон юм.

Одоо 19 настай хүү 6 сая долларын хөрөнгөтэй "Teal" компанийн эзэн болжээ. Энэхүү компани нь арилжааны зориулалттай, батарейгаар ажилладаг нисэгчгүй онгоц, автомат камер, 70 миль/цагийн хурдтай агаарын тээврийн хэрэгсэл үйлдвэрлэж байна.

Жеорж зургаан жил тасралтгүй хөдөлмөрлөсний үр дүнд дөрвөн үндсэн ажилтан, 15 гэрээт зөвлөхтэйгөөр үйл ажиллагаа явуулж, компаниа хөл дээр нь босгожээ. Тэрээр 20 жилийн дараа АНУ-ын автомашин, эрчим хүч үйлдвэрлэгч "Tesla" корпорацийн эзэн болно гэж мөрөөддөг байна.

Жеорж өнгөрсөн жил дунд сургуулиа дүүргэсэн бөгөөд компанийнхаа бүтээгдэхүүнийг хөгжүүлэхийн тулд коллежид элсэх төлөвлөгөөгөө түр хойшлуулжээ. "Намайг жаахан байхад ээж, аав минь дуртай зүйлээ олж хий гэж байнга захидаг байсан" хэмээн саятан хүү амжилтын түүхээсээ хуваалцаж байна.