НЭГ ШӨНИЙН ДОТОР НЭГ ДҮҮРЭГТ 39 СОГТУУ ЖОЛООЧ ХӨДӨЛГӨӨНД ОРОЛЦОЖ БАЙСНЫГ ИЛРҮҮЛЖЭЭ

Замын цагдаагийн албанаас "Шинэ жил-Эргүүл хяналт" арга хэмжээг зохион байгуулан бүрэн бүрэлдэхүүнээрээ гудамж замд хяналт шалгалт болон хөдөлгөөн зохион байгуулалт хийж үүрэг гүйцэтгэж байна. Энэхүү арга хэмжээ нь шинэ жилийн баярыг угтаж Нийслэл Улаанбаатар хотын хэмжээнд зам тээврийн осол, зөрчлийн гаралтыг бууруулах, замын хөдөлгөөний нөхцөл байдлыг тогтворжуулах, осол, хэргээс урьдчилан сэргийлэх зорилготой юм. Шөнийн эргүүл хяналт шалгалтаар алба хаагчид арванхоёрдугаар сарын 25-ны шөнө Хан-Уул дүүргийн нутаг Энхтайваны гүүрний баруун урд замд марк, улсын дугаар тодорхойгүй автомашины жолооч нь явган зорчигч Э-г мөргөж гэмтээгээд ослын газрыг орхиж явсан байна. Цагдаагийн байгууллага шуурхай эрэн сурвалжлах ажиллагаа явуулсны дүнд уг ослыг "T.Landcruiser-200" маркийн автомашины жолооч А гаргасан болохыг тогтоон шалгаж байна. Арванхоёрдугаар сарын 25-ны өдөр Замын цагдаагийн албаны жижүүрийн шуурхай удирдлагын хэлтэст нийт 363 дуудлага, мэдээ мэдээлэл хүлээн авснаас зам тээврийн ослын 289 дуудлага бүртгэгдсэн байна. Осол хэргийн улмаас таван хүн гэмтэж бэртсэний хоёр нь бага насны хүүхэд байсан бөгөөд явган зорчигч хэлбэрээр хөдөлгөөнд оролцож байх үедээ осолд өртжээ.