ТОСК-ИЙН ЗАХИРАЛ АСАН А.ГАНТУЛГАД ХОЛБОГДОХ ХЭРГИЙГ ШАЛГАЖ ДУУСААД ПРОКУРОРТ ШИЛЖҮҮЛЖЭЭ

Хөгжлийн банкнаас үүдэлтэй хэрэг гэгдэх их хэмжээний мөнгө хувьдаа завшсан, улсад их хэмжээний хохирол учруулсан гэх хэрэг шүүхэд шилжихээр болжээ. Тодруулбал, Хөгжлийн банкны гүйцэтгэх захирлаар ажиллаж байсан Н.Мөнхбат, төлөөлөн удирдах зөвлөлийн дарга асан Б.Шинэбаатар нарт холбогдох эрүүгийн хэргийг Авлигатай тэмцэх газраас энэ сарын 16-ны өдөр шүүхэд шилжүүлэх саналтай Нийслэлийн прокурорын газарт шилжүүлсэн.

Харин "ТОСК" ТӨҮГ-ын захирал А.Гантулга нарын зургаан хүнд холбогдох Буянт-Ухаа хорооллын орон сууцуудаас албаны эрх мэдлээ урвуулан ашиглаж, өөрсдийн хамаарал бүхий этгээдүүдийн нэр дээр шилжүүлэн завшсан 12 үйлдэлтэй хэргийг прокурорын хяналтад шүүхэд шилжүүлэх саналтай хүргүүлсэн байна.

Төрийн орон сууц, санхүүжилтийн корпорацийн гүйцэтгэх захирал асан Н.Гантулгыг албан тушаалаа хэтрүүлэн ашигласан, улсад онц их хэмжээний хохирол учруулсан гэх үндэслэлээр 2016 оны сүүлээс эхлэн АТГ-аас шалгаж эхэлсэн билээ. Түүний хэргийг шалгаж байсан ажлын хэсэг 2017 оны дөрөвдүгээр сарын сүүлээр Н.Гантулгыг баривчлан хэргийг шалгах ажиллагааг үргэлжлүүлсэн юм. Мөн Н.Гантулгыг цагдан хорьж шалгасны дараа гадуур байцааж эхэлсэн байдаг. Түүнийг Хөгжлийн банкнаас авсан хөрөнгийг дур зоргоороо зарцуулсан. Мөн энэ зарцуулалтаараа дамжуулан хувьдаа хөрөнгө завшсан байж болзошгүй гэх үндэслэлээр яллах дүгнэлт үйлдүүлэхээр прокурорын байгууллагад шилжүүлээд байгаа аж. Зарим эх сурвалжийн мэдээллээр Н.Гантулгыг эрүүгийн хуулийн 265,2, 268, 150, 150,3 гэсэн зүйл ангиудаар эрүүгийн хэрэг үүсгэн шалгаж байсан аж.