АГААРЫН БОХИРДЛЫГ БУУРУУЛАХААР УСАН БУУ ТУРШИВ

Энэтхэгийн Засгийн газар агаарын бохирдлыг бууруулахаар маш өвөрмөц шийдэл бодож олжээ. Нийслэл Дели хотын агаарын бохирдол хамгийн ихтэй Ананд Вихар дүүрэгт утаа арилгах машиныг амжилттай туршсан байна. Энэхүү машинаар даралттай ус шүршиж, цацсанаар шингэн дуслууд агаарт 69 метрийн өндөр замхрах юм. Ингэснээр агаарт хуримтлагдсан тоос, тоосонцор, хорт хийг борооны ус мэт цэвэршүүлж байгаа ажээ.

Тус улсын Хүрээлэн буй орчны сайд Имран Хуссейн CNN агентлагт өгсөн ярилцлагадаа цаашид ус шүршигч машинуудын тоог нэмж, нисдэг тэрэг ашиглах төлөвлөгөөтэй байгаа гэжээ. Гэвч энэ аргаар хотыг тэр чигт нь биш зурвасхан газрыг цэвэршүүлэх боломжтой бөгөөд үр дүн нь хэсэгхэн зуур ажиглагдаад өнгөрөх сул талтай ажээ. Тиймээс энэ бол хүн амынхаа эрүүл мэндийг бодсон түр зуурын арга гэдгийг сайд Имран онцолсон байна.

Дели хотын зарим хэсэгт агаарын бохирдол Дэлхийн Эрүүл мэндийн байгууллагын тогтоосон хэвийн хэмжээнээс 30 дахин их байна. Бохирдлын хэмжээг бууруулахын тулд дээр дурдсан аргаас гадна барилгын ажлыг түр зогсоох, автомашинтай иргэдийг машинаа зогсоолд тавихад нь туслахаар зогсоолын төлбөрийг бууруулсан байна.

Өвлийн улиралд Делид агаарын бохирдол аюултай түвшинд хүрч нэмэгддэг нь хөрш зэргэлдээх Пунжаб, Харьяана мужуудад фермерийн аж ахуй эрхэлдэг иргэдээс ихээхэн шалтгаалдаг. Газар тариалангийн аж ахуй эрхлэгчид тариалангийн талбайд үлдсэн хог хаягдлаа цэвэрлэхийн тулд их хэмжээний талбайг шатаадаг байна. Салхины хурд удаан, барилга байгууламж барих үеэр тоосжилт ихэсдэг, хог хаягдлаа шатааж устгадаг зэрэг нь агаар бохирдох шалтгаанууд юм.