УИХ-ЫН ГИШҮҮДИЙН БҮРЭН ЭРХИЙГ ТҮДГЭЛЗҮҮЛЭН ШАЛГАХ БОЛОМЖТОЙ БОЛЛОО

Үндсэн хуулийн цэц УИХ-ын гишүүдийг энгийн иргэдтэй адил шалгаж болох эсэхийг хэлэлцэж, Их суудлын хуралдааны шийдвэрээ уншиж танилцууллаа.

Шийдвэрийг Үндсэн хуулийн цэцийн гишүүн Чинбат уншиж сонсголоо.

Монгол улсын Монгол Улсын Их Хурлын тухай хуульд,

6.9.Дор дурдсан тохиолдолд гишүүний бүрэн эрхийг түдгэлзүүлэх саналыг Улсын ерөнхий прокурор Улсын Их Хуралд оруулах бөгөөд Улсын Их Хурал гишүүний бүрэн эрхийг түдгэлзүүлэх эсэхийг шийдвэрлэнэ:

6.9.1.гэмт хэрэг үйлдэж байхад нь буюу хэргийн газарт нотлох баримттайгаар баривчилсан гэж заасан.

Харин уг хурлаар үндсэн хууль зөрчсөн гэж үзэн "6.9.1 гэмт хэрэг үйлдэж байхад нь буюу хэргийн газарт нотлох баримттайгаар баривчилсан" гэх заалтыг хүчингүй болголоо.

Ингэснээр "гэмт хэрэг үйлдэж байхад нь буюу хэргийн газарт нотлох баримттайгаар баривчилснаас бусад тохиолдолд УИХ-ын гишүүний бүрэн эрхэд халдах боломжгүй" байсныг хүчингүй болгож буй юм. Өөрөөр хэлбэл, УИХ-ын гишүүн ямар нэгэн хэрэгт холбогдлоо гэхэд түүнийг цагдан хорьж, таслан сэргийлж болохгүй, нэгжлэг үзлэгийг ажлын байр, биед нь хийж болохгүй байсан юм. Мөн биологийн шинжилгээ /цус, ДНК гэх мэт/ хийх боломжгүй байсан. Энэ нь Үндсэн хуулийн хүн бүр хуулийн өмнө тэгш эрхтэй байна гэсэн агуулгыг зөрчиж байсан билээ.