ТАЙВАНЬД ЧАНАРГҮЙ ХҮНС ҮЙЛДВЭРЛЭГЧДИЙГ ИНГЭЖ ШИЙТГЭДЭГ

Дэлхий нийтээрээ хүнсний аюулгүй байдлын тухай ярьж буй энэ үед Тайвань энэ асуудалд онцгойлон анхаарч байна. Ерөнхийлөгч Цай Инвень улсынхаа хүнсний аюулгүй байдлын менежмент, мэргэжлийн хяналтын хүчин чадлыг сайжруулж, 2017 онд төсвөө 50 хувиар нэмэгдүүлжээ. Нийтээрээ эрүүл хүнс хэрэглэхийн тулд үйлдвэрлэгч, фермерүүдэд хатуу хяналт тавьдаг байна. Жишээлбэл, чанаргүй хүнс зарж буй талаар мэдээлэл өгсөн хүнд 60 мянган ам.долларын мөнгөн урамшуулал олгодог ажээ.

Тайваньд 2011-2014 онд цай, жимсний ундаа, ургамлын тосноос хорт бодис илэрч, шуугиан дэгдээж байсан юм. Тухайн үед Ерөнхий сайд Зян И Хуа хүнсний аюулгүй байдлыг зөрчсөн бүтээгдэхүүн үйлдвэрлэвээс хатуу шийтгэнэ гэдгээ мэдэгдэж, чанаргүй ургамлын тос нийлүүлсэн компанид 1,6 сая ам.долларын торгууль тавьж, эзнийг нь 20 жил хорих ялаар шийтгэжээ. Энэ ургамлын тос нь зүрх судасны өвчинг сэдрээх аюултай бодис агуулсан болох нь тогтоогдсон гэнэ.