ХӨГЖЛИЙН БЭРХШЭЭЛТЭЙ ӨВӨӨ ӨӨРИЙН ХӨРӨНГӨӨР ЗАМ ТАВЬЖЭЭ

76 настай Жан Живен дүлий хүн боловч ариун цагаан хөдөлмөрөөр юуг ч бүтээж чадна гэсэн хүсэл мөрөөдөлтэй. Тэрээр сүүлийн таван жил ганцаараа төрөлх Чунцин хотынхоо ойролцоох Фулинг уулын ойн цоорхойд барилгын материал зөөж, явган хүний зам тавьсан байна. Жан гуай мөнгөө цуглуулан элс, шороо авчирч асгахын зэрэгцээ ойр хавийн эвдэрч, сүйдсэн байшингуудын тоосго, чулууг зөөж байж арайхийн зам тавьсан байна.

Ингэснээр уулын оройд амьдардаг алслагдсан тосгоны иргэдийг орчин үеийн зам харгуйтай холбох, аюулгүй байдлыг нь хангах зорилготой ажээ. Учир нь тосгоны хүүхдүүд сургуульдаа явах гэж олсоор уулнаас бууж, маш аюултай замыг туулдаг байжээ. Одоо Жан өвөө олон зуун метрийн урттай явган хүний зам барьж дуусаад тосгоны иргэдийг цэвэр усны эх үүсвэртэй болгох өөр ажлыг шамдан эхлүүлжээ.

Түүний эхнэр Ван Линьян нь мөн хөгжлийн бэрхшээлтэй бөгөөд хараагүй хүн юм. Гэсэн ч тэр нөхрийнхөө сайхан сэтгэлийг дэмжиж, уул руу байнга хоол зөөдөг ажээ.

Ууланд хүнд хүчир ажил хийх нь Жан гуайд тийм ч амар байгаагүй юм. Тэрээр нэг удаа хөлөн дээрээ том чулуу унагаад азаар удалгүй эдгэсэн байна. Энэ хүн тосгоны иргэдийн баярлаж, талархсан сэтгэлийг сонсож чадахгүй ч инээмсэглэл, харцнаас нь ойлгодог гэнэ.