ФРАНЦЫН ХОТУУД ДҮРВЭГЧДЭЭР ДҮҮРЧЭЭ

Францын долоон томоохон хотын захирагчид хууль бус цагаач, дүрвэгчдийн эсрэг хана босгох шаардлагатай боллоо гэж мэдэгдэв. Учир нь тэд улс төрийн орогнол хүсэгчид, дүрвэгчдээ дийлэхээ больж, ямар нэгэн арга хэмжээ авч өгөхийг Засгийн газраас хүсч байна. 2017 он гарсаар Францад амьдрах хүсэлтэй дүрвэгчдийн тоо эрс нэмэгдсэн ч тэднийг амьдруулах орон байр шинээр баригдаагүй ажээ. Тиймээс ядаж 20 мянган айлын орон сууц барьж, ашиглалтад оруулсны дараа цагаачдын өргөдөлд хариу өгөх хэрэгтэй гэж орон нутгийн эрх баригчид үзэж байна.

Дүрвэгчид Европын туннелээр дамжин Францын газар нутагт хөл тавьж, улмаар цагаачлан гарах сонирхолтой байдаг. Тэд боомтоор орж ирсэн даруйдаа тал тал руу зугтаж, бүлэглэн оргох болсон нь хяналтад авах боломжийг үгүй хийж байгаа ажээ. Дүрвэгчдийг түр орогнуулах бааз байгуулсан ч хяналтаас гарч, нийслэл Парисын гудамжаар хоноглож, ил задгай бие засах нь ихэсжээ. Нутгийн иргэд ч аюулгүй байдалдаа санаа зовних болсон байна. Тиймээс өнгөрсөн долоо хоногт Парисын үйлдвэрчний эвлэлээс Афган, Сирийн дүрвэгчдийг орогнуулах баазаа хойд хотууд руу нүүлгэн шилжүүлэхгүй бол ажил хаялт зарлана гэдгээ илэрхийлжээ.

Европ руу цагаачлагчид Сири, Ливи, Египет, Йемен, Судан, Саудын Араб зэрэг Арабын иргэний дайн, үймээний хөлд нэрвэгдсэн орнуудаас ирж байна. Өнгөрсөн оны байдлаар Сири улсаас гэхэд жилд 2 сая дүрвэгч эх орноо орхин гарсан гэх тоо баримт байгаа юм.