БИТКОИНЫ ХӨРӨНГӨ ОРУУЛАГЧИД БҮХ МӨНГӨӨ АЛДАНА

Биткоин нь нэгэн төрлийн хувьцаа гэж хэлж болохоор цахим валют буюу мөнгөн тэмдэгт юм. Энэхүү цахим, биет бус мөнгө нь тусгай компютерийн програмчлалаар кодчилогдсон дахин давтагдашгүй гэдгээрээ бусад төлбөрийн хэрэгслүүдээс ялгаатай. Дэлхийн хамгийн нэртэй криптовалют болох биткоины ханш 20.000 долларт хүрч, нэр хүнд нь өсч байна.

Дэлхийн томоохон компаниуд, хөрөнгө оруулагчид биткоин руу хошуурч байгаа энэ үед Британийн Санхүүгийн зохицуулах хорооноос сануулга өгчээ. Тус байгууллагын мөнгөний бодлогыг зохицуулах газрын дарга Эндрю Бэйли "Биткоин бол валют биш. Ямар ч зохицуулалт, хяналт байхгүй. Энэ бол ханшаа зохиомлоор өсгөж байгаа үйлдэл тул биткоинд хөрөнгө оруулах гэж байгаа хүн байвал бүх мөнгөө алдана гэдгээ эртнээс мэдэж, бэлтгэлтэй байгаарай гэдгийг хатуу сануулъя" гэж хэвлэлд өгсөн ярилцлагадаа дурджээ.

"Anglia Ruskin University", "Dublin City University" их сургуулийн эрдэмтдийн хамтарсан судалгаагаар биткоин нь уламжлалт валютын ханшийг бууруулж, санхүүгийн тогтворгүй байдалд нөлөөлөх аюултай гэдгийг тогтоосон байна. "Биткоин нь хөрөнгө оруулагчдын дамлан худалдаалж, хиймлээр үнийн хөөс үүсгэж, хөөрөгдөж буй валют гэдгийг бид илрүүлсэн. Биткоины сүлжээнд төрийн ямар нэгэн зохицуулалт ордоггүй учир маш эрсдэлтэй" хэмээн уг судалгааг хийсэн профессор Лариса Яровая онцолсон байна.